धनगढी, २६ जेठ  /  बागेश्वरी अटोमोटिभ्स धनगढीको आयोजनामा टीभीएस अपाचे राइड कार्यक्रम सम्पन्न भएको छ। जेठ २३ गते आयोजित उक्त राइडमा ३० भन्दा बढी अपाचे मोटरसाइकल चालकहरूको सहभागिता रहेको थियो।

कार्यक्रम जगदम्बा मोटर्स र बागेश्वरी अटोमोटिभ्स धनगढीको संयुक्त सहकार्यमा आयोजना गरिएको हो। नेपालका लागि टीभीएस मोटरसाइकलको आधिकारिक वितरक जगदम्बा मोटर्स रहेको छ भने धनगढी क्षेत्रको आधिकारिक विक्रेताको रूपमा बागेश्वरी अटोमोटिभ्सले सेवा प्रदान गर्दै आएको छ।

राइड धनगढीस्थित बागेश्वरी अटोमोटिभ्सको प्रदर्शनी कक्षबाट सुरु भई अत्तरिया हुँदै हाटखोली क्षेत्रमा पुगेर सम्पन्न भएको थियो। राइड सम्पन्न भएपछि सहभागी चालकहरूले वातावरण संरक्षण अभियानअन्तर्गत वन कार्यालयबाट उपलब्ध गराइएका बिरुवा हाटखोली वन क्षेत्रमा लगेर १०० भन्दा बढी बिरुवा रोपण गरेका थिए।

कार्यक्रमले मोटरसाइकलप्रेमीहरूबीच आपसी सम्बन्ध सुदृढ बनाउनुका साथै सुरक्षित तथा जिम्मेवार सवारी संस्कृतिको विकासमा योगदान पुर्‍याउने विश्वास आयोजकले व्यक्त गरेको छ। यस्ता राइडमार्फत चालकहरूलाई सुरक्षित सवारी सञ्चालन, सडक सुरक्षाका उपाय तथा सवारी साधनको उचित प्रयोगबारे जानकारी प्रदान गरिँदै आएको जनाइएको छ।

बागेश्वरी अटोमोटिभ्सले विगतदेखि नै सामाजिक उत्तरदायित्वसँग सम्बन्धित विभिन्न कार्यक्रम सञ्चालन गर्दै आएको जनाएको छ। आगामी दिनमा पनि ग्राहक तथा राइडरहरूसँगको सम्बन्धलाई अझ सुदृढ बनाउन विविध कार्यक्रम सञ्चालन गरिने कम्पनीले जनाएको छ।

टीभीएस अपाचे राइडजस्ता कार्यक्रमले चालकहरूलाई नयाँ अनुभव प्रदान गर्नुका साथै समुदाय, वातावरण संरक्षण र सुरक्षित यात्राको सन्देश प्रवाह गर्न महत्वपूर्ण भूमिका खेल्ने अपेक्षा गरिएको छ।

बागेश्वरी अटोमोटिभ्सले धनगढीबाट विगत १० वर्षदेखि तथा अत्तरियाबाट पाँच वर्षदेखि टीभीएसका मोटरसाइकल तथा स्कुटर बिक्री–वितरण गर्दै आएको जनाएको छ। कम्पनीले ग्राहकहरूलाई लक्षित गर्दै मोटरसाइकल तथा स्कुटर खरिदमा विशेष योजना, आकर्षक छुट तथा बिक्रीपछिको सेवा उपलब्ध गराइरहेको जानकारी दिएको छ।