टेकसिँह धामी/ धनगढी : सुदूरपश्चिमबाट पुनः श्रमस्वीकृति लिनेको संख्या ह्वात्तै घटेको छ।
सुदूरपश्रिम प्रदेशका सबै जिल्लाहरु हेर्नेगरी सुदूरको अस्थायी मुकाम धनगढीमा २०७५ सालमा श्रम तथा रोजगार कार्यालय स्थापना भयो। तर हाल उक्त कार्यालयबाट सेवा लिने सेवाग्राही घटेका छन्।
अचेल अनलाइन तथा प्रविधिको प्रयोग बढेसँगै लिखित रुपमा हुने गरेका काम ठप्प भएका छन्। सरकारले पनि अनलाइनबाटै फारम दर्ता गर्ने सुविधा प्रदान गरेकाले कार्यालयबाट स्वीकृति लिनेको संख्या घटेको कार्यालयका सूचना अधिकारी जय देव विष्टले बताए।
कार्यालयको तथ्यांकअनुसार आर्थिक वर्ष २०७६र७७ मा २ हजार ३ सय २१ जना पुरुष र ४० जना महिला गरी जम्मा २ हजार ३ सय ६१ जनाले स्वीकृति लिएका थिए।
चालु आर्थिक वर्ष २०७७र७८ को फागुन मसान्तमा मात्रै ४ सय ९७ पुरुष र ९ जना महिला गरी जम्मा ५ सय ६ जनाले मात्रै श्रम स्वीकृति लिएका छन्। अनलाइनको माध्यमले केही प्रभाव पारे पनि प्रविधिको पहुँचमा नभएका र प्रविधिबारे जानकारी नहुने सेवाग्राहीका लागि भने प्रदेशमै श्रम तथा रोजगार कार्यालय स्थापना भएपछि भने सहज भएको छ।
विगतमा वैदेशिक रोजगारका लागि पुनः श्रमस्वीकृति लिन काठमाडौं जानुपर्ने बाध्यता थियो। प्रदेशमै उक्त सेवा पाउँदा विगतभन्दा अहिले सहज महसुस भएको धनगढीका धन बहादुर बोगटीले बताए।
