धनगढी, ३० फागुन
धनगढी उप–महानगरपालिकाले संचालनमा ल्याएका प्रशुती केन्द्रहरुको शुक्रवार स्वास्थ्य विज्ञहरुको टोलीले अनुगमन गरेको छ ।
धनगढी उप–महानगरपालिकाका उप–प्रमुख सुशीला मिश्र भट्टका अनुसार स्वास्थ्य मन्त्रालयका पूर्व सचिव सुशिल प्याकुरेल, हनी मल्ल लगायतको टोलीले धनगढी उप–महानगरपालिकाका प्रशुती केन्द्रहरुको अनुगमन गरेका हुन । उप–प्रमुख भट्टले धनगढी उप–महानगरपालिका ७ मा रहेको बेली शहरी स्वास्थ्य प्रवद्र्धन केन्द्र, वडा नं १९ मा रहेको फुलबारी स्वास्थ्य चौकी, वडा नं १६ मा रहेको घसीटा स्वास्थ्य चौकीमा संचालनमा रहेको प्रशुती केन्द्रहरुको अनुगमन गरिएको बताईन । अहिले संचालनमा रहेका प्रशुती केन्द्रहरुको सेवालाई थप गुणस्तरीय बनाउनका लागि चाडै कार्यक्रम ल्याउने तयारी भैरहेको छ उप–प्रमुख भट्टले भनिन्, त्यसैले स्वास्थ्यको विज्ञ टोलीलाई अनुगमनमा लगेका हौं ।
नेपाल सरकार स्वास्थ्य मन्त्रालयका पूर्व सचिव सुशिल प्याकुरेलले सेती प्रादेशीक अस्पतालमा गोल्डेन कम्यूनिटीको सहयोगमा प्रशुतीलाई गुणस्तरीय बनाउन संचालनमा ल्याएको कार्यक्रम धनगढी उप–महानगरपालिकाका प्रशुती केन्द्रमा पनि संचालनमा ल्याउने तयारी भैहरेको बताए ।
त्यसैगरी पूर्व सचिव सुशिल प्याकुरेलले त्रिनगर भन्सार नाकामा कोरोना भाइरस भित्रीन नदिन उप–महानगरपालिकाले संचालनमा ल्याएको हेल्थ डेस्कको अनुगमन गरे । उप–महानगरपालिकाले आफ्नै प्रयासले हेल्थ डेस्कमा निकै प्रभावकारी रुपमा काम गरिरहेको पाए प्याकुरेलले भने, तर प्रदेश सरकारको सहयोग त्यहाँ खट्कीएको मैले पाए । प्रदेशको मुख्य नाका भएर पनि प्रदेशले गतिविधी संचालन गर्न सकेको भेटिएन ।