धनगढी, ५ कातिक
दिपावली, छठ लगायतका चाडपर्वहरुलाई ब्यबस्थीत बनाउनका लागि मंगलबार धनगढी उप–महानगरपालिकामा सरोकारवालाहरु संग छलफल भएको छ ।
धनगढी उप–महानगरपालिका र वडा प्रहरी कार्यालय संगको समन्वयमा यूवा शान्ति परिषदले सरोकारवालाहरु संग छलफल चलाएको हो । चाडपर्वमा घट्न सक्ने घटना, मदिरा सेवन, खाद्यपदार्थमा हुन सक्ने मिसावट, पटाका पट्काउने कुरा लगायत जुवातासलाई न्यूनिकरण गर्नका लागि सरोकारवालाहरु संग छलफल भएको धनगढी उप–महानगरपालिकाका प्रमुख नृपबहादुर वडले बताए । उनले भने, चाडपर्वको समयमा सबैले आफ्नो क्षेत्रबाट कसरी शान्ति शुरक्षा लगायतका कुरामा सहयोग, समन्वय गर्न सक्छ भन्नेबारेमा राम्रो छलफल भएको छ ।
धनगढी उप–महानगरपालिकाका उप–प्रमुख सुशीला मिश्र भट्टले चाडपर्वलाई भड्कीलो बनाउन नहुने बताईन । उनले भनिन्, चाडपर्व जिवनशैली भएकाले परंपरा अनुसार मनाउनुपर्छ न कि तडकभडक गरेर ।
वडा प्रहरी कार्यालय कैलालीका प्रहरी निरिक्षक पुष्कर पन्तले शान्तिसुरक्षा प्रहरीको मात्रै सरोकारको बिषय नभएको बताए । उनले भने, स्थानीयको सहयोग भएमा प्रहरी सबै किसिमका बिकृती नियन्त्रण गर्न सक्छ । यूवा शान्ति परिषद कैलालीका संयोजक प्रेम ढुंगानाले चाडपर्वहरुलाई ब्यबस्थीत बनाउनको निम्ती सरोकारवालाहरु जिम्मेवार हुनुपर्ने बताए । उनले भने, यो छलफलले चाडपर्व ब्यबस्थीत हुने आशा गरेका छौं । छलफलमा उद्योग बाणिज्य संघका महासचिव ओम बिष्ट, होटल ब्यासिायी संघका अध्यक्ष कलम बम लगायत संघ संस्थाका प्रतिनिधी र ब्यापारीहरुको सहभागिता रहेको थियो ।