धनगढी, १ मंसिर
धनगढी उप–महानगरपालिकाका उप–प्रमुख शुसीला मिश्र भट्टले एकल महिलाको अवस्थामा सुधार ल्याउनका लागि उद्यमशिलता आवश्यक भएको बताएकी छन् ।
एनआरएन यूएसए च्याप्टर र विलवाउकी नेपाली परिवारले  धनगढी उप–महानगरपालिका १५ कनरीमा एकल महिलाको संस्था दिगोविकास केन्द्रले संचालन गरेको नेटहाउस फार्मिङ्गका लागि जुटाएको रकम हस्तान्तरण गर्दै यस्तो धारणा राखेकी हुन । उप–प्रमुख भट्टले आदर्श र अधिकारका कुरा गरेर मात्रै एकल महिलाको जिवनस्तरमा सुधार ल्याउन नसकिने भएकाले उद्यमशिलतामा लगाउन आवश्यक भएको बताईन ।
बिदेशमा काम गरेर कमाएको कमाईबाट केही पैशा छुट्याएर आफ्नो जन्मभूमीमा रहेका एकल महिलाको जिवनस्तरलाई माथी उठाउन सहयोग गर्ने नेपालीहरु धन्यवादका पात्र हुन उप–प्रमुख भट्टले भनिन्, नेपाली जहाँ भएपनि आफ्नो देशका बारेमा निकै चिन्तीत देखिन्छन् । तर बिदेममा रहेका नेपालीहरुलाई स्वदेशमा रहेका नेपालीहरुले हेर्ने दृष्टीकोण सकारात्मक नरहेको उप–प्रमुख भट्टले बताईन ।
दिगो विकास केन्द्रले धनगढी उप–महानगरपालिका १५ कनरीमा ९ कठ्ठा जग्गा भाडामा लिएर आर्गानीक नेटहाउस फार्मिङ्ग सुरु गरेको संस्थाका अध्यक्ष बेद अवस्थीले बताईन । नेटहाउस फार्मिङ्गमा प्राविधीक सहयोग ठाकुर करियाप्रधान लगायतको टिमले गरिरहेको छ । यस अघि गौरा समाज अमेरीका लगायतले पनि सहयोग गरेको थियो ।