धनगढी, १६ वैशाख/ जिल्ला प्रशासन कार्यालय कैलालीले एक हप्ताका लागि जारी गरेको निषेधाज्ञा बिहिबार विहानबाट सुरु भएको छ।

कोरोना संक्रमितको संख्य बढ्दै गएपछि स्थानीय प्रशासनले घोषणा गरेको निषेधाज्ञा कार्यान्वयन गर्नका लागि जिल्ला भरी नै प्रहरी परिचालन गरिएको छ।

सुदूरपश्चिम प्रदेशको अस्थायी राजधानी धनगढीमा जिल्ला प्रहरी कार्यालय कैलाली र वडा प्रहरी कार्यालयको टोली चौराहा, एलएन चोक, पार्कमोड, क्याम्पस चोक लगायत स्थानमा खटिएको छ।

जिल्ला अन्य स्थानमा ईलाका र प्रहरी चौकीको टोली परिचालन भएको जिल्ला प्रहरी कार्यालय कैलालीका प्रवक्ता तथा प्रहरी नायव उपरीक्षक भरत चाैधरी बताए।

अत्यावश्यक सवारी साधन जस्तै एम्बुलेन्स, खाद्य तथा स्वास्थ्य सामग्री बोकेको सवारी साधन, दुग्जन्य पदार्थ बोकेको सवारी, बैंक तथा बित्तीय संस्थाका सवारी, दूरसञ्चार तथा इन्टरनेट र आइशोलेसनका सवारी स्पष्ट खुल्ने कागजातका आधारमा सञ्चालन भइरहेका छन्।

तर विभिन्न वाहान बनाएर निषेधाज्ञाको उलंघन गर्नेलाई भने प्रहरीले कारवाही गरिरहेको छ। प्रहरीले निषेधाज्ञा उलंघन गर्नेलाइ नियन्त्रणमा लिएर केही समय सवारी साधान होल्ड गरिरहेको छ।