धनगढी, माघ १९/ सुदूरपश्चिम प्रदेशमा २ घण्टाभित्र २ पटक भूकम्पको धक्का महसुस गरिएको छ। भूकम्प मापन केन्द्र सुर्खेतका टेक्निकल असिस्टेन्ट तीर्थराज दाहालका अनुसार गएराति २ पटक भूकम्प गएको हो।

पहिलो भूकम्पको धक्का राति १२ बजेर ४६ मिनेटमा गएको केन्द्रले जनाएको छ। ३ दशमलव ६ रेक्टर स्केल मापन गरिएको उक्त भूकम्पको केन्द्रबिन्दु नेपाल–भारत सीमा खलंगाबाट उत्तर-पश्चिमतर्फ १८ किलोमिटर टाढा रहेको छ।

यस्तै, दोस्रो भूकम्पको धक्का पनि राति २ बजेर ३४ मिनेटमा महशुस गरिएको थियो। ३ दशमलव ७ रेक्टर स्केलको सो भूकम्पीय धक्काको केन्द्र बझाङको गडराय रहेको जनाइएको छ। भूकम्पबाट क्षति भएरनभएको कुनै जानकारी नआएको प्रहरीले जनाएको छ।

सुदूरपश्चिममा पछिल्लो समय लगातार भूकम्प गइरहेको छ। यसअघि गत पुस २८ गते दार्चुलाको सुनसेरा आसपास केन्द्रबिन्दु भएर ४ दशमलव २ रेक्टर स्केलको भूकम्प गएको थियो भने पुस १९ गते पनि बैतडीको डिलाशैनी आसपास केन्द्र भएर ३ दशमलव ५ रेक्टर स्केलको महशुस गरिएको थियो।