धनगढी, २२ भदौ /  सुदूरपश्चिम प्रदेश धनगढीमा सामाजिक सञ्जाल बन्द गरेकोप्रति सञ्चारकर्मीले विरोध गरेका छन् । अनलाइन टीभी पत्रकार संघको आयोजनामा मुख्यमन्त्री कार्यालय अगाडी संकेत स्वरुप विभिन्न मिडियामा कार्यरत मिडियाकर्मीको उपस्थितिमा  विरोध गरिएको हो ।

सरकारले निरुंकुश शैली अपनाएर लाखौंको रोजीरोटी समेत बन्द गरेको भन्दै विरोध गरेका हुन् । सामाजिक सञ्जाल नियमन गर्ने नाममा बन्द गर्नु सरकारले गैरजिम्मेवारी कार्य गरेको अनलाइन टीभी संघ सुदूरपश्चिमका अध्यक्ष भक्तराज जोशीले बताए ।

यस्तै पत्रकार महासंघ कैलालीका अध्यक्ष श्रवण देउवाले, सरकार आलोचनाको सामना गर्ने पक्षमा नरहेको यो कदमबाट थाहा पाउन सकिने बताए । आलोचनाहरु माध्यम बन्द गरेर सकिन्छन् भनेर सोच्नु नै नीतिसंगत नरहेको बताए । सरकारले नियमन गर्ने नाउमा सामाजिक सञ्जाल नै बन्द गरेको कुनै हालतमा पनि सह्य नहुने महासंघका अध्यक्ष देउवाले बताए ।

पत्रकार महासङ्घ कैलालीका निवर्तमान अध्यक्ष हिमालय जोशीले पनि सामाजिक सञ्जाल माथिको प्रतिबन्ध गणतन्त्र माथिकै प्रहार भएको बताए।

अलाइन टिभी संघका केन्द्रीय सदस्य विरेन्द्र धामीले सरकारको यो कदमले लाखौं प्रभावित भएको बताए । विदेशमा रहेका नेपाली घरपरिवारबाट फेरि विछोडिको बताए। म यही डिजिटल मिडियामा रहेर दश वर्ष भन्दा बढी नेपालमा बाँचीरहेको बताए। सरकारको यो कदमले म जस्ता हजारौं युवाको पेटमा लात हानेको बताए ।

यस्तै पत्रकार महासंघ सुदूरपश्चिमका अध्यक्ष भरत शाहले सरकारले यथा शिघ्र सामाजिक सञ्जालमाथिको प्रतिबन्ध फुकुवा गर्नु पर्ने माग राखे ।

विरोधसभामा थुप्रै मिडियाकर्मीको उपस्थिति रहेको थियो । अनलाइन टीभी पत्रकार संघले चरणबद्ध विरोध प्रर्दशन गरिरहने समेत जानकारी दिएको छ ।