धनगढी, २१ मंसिर/ आगामी फागुन २१ गते हुने प्रतिनिधिसभा निर्वाचनलाई लक्षित गर्दै कैलाली क्षेत्र नम्बर ५ मा नेपाली कांग्रेसभित्र आन्तरिक राजनीतिक गतिविधि बढेको छ । कांग्रेस निकट स्रोतहरूले दिएको जानकारीअनुसार पार्टीकी केन्द्रीय सदस्य तथा पूर्व परराष्ट्रमन्त्री डा. आराजु राणा देउवा सो क्षेत्रबाट प्रतिस्पर्धामा उत्रने विषयले तीव्रता पाएको छ ।

जेनजी आन्दोलनपछि स्थानीय कार्यकर्ता, जनप्रतिनिधि तथा पार्टी नेतृत्वसँग निरन्तर आन्तरिक छलफलमा सक्रिय देखिएपछि उनको उम्मेदवारीबारेको चर्चा झनै बलियो बन्दै गएको छ । पार्टी स्रोतका अनुसार हालै कैलाली ५ का काँग्रेस नेताहरूबीच भएको परामर्शमा डा. राणाको नाम अग्रपंक्तिमा रहेको र उनी क्षेत्रको राजनीतिक गतिशीलतामा सक्रिय भईसकेको संकेत मिलेको छ ।

डा. आराजु राणाले पूर्व परराष्ट्रमन्त्रीका रूपमा कूटनीतिक क्षेत्रमा उल्लेख्य भूमिका निर्वाह गरेको पार्टी निकट नेताहरू बताउँछन् । उनका अनुसार अन्तर्राष्ट्रिय तहमा नेपालको छवि मजबुत बनाउने, कूटनीतिक समन्वय तथा विदेश नीतिमा सक्रियता बढाउने कार्यमा उनले महत्वपूर्ण योगदान दिएका थिए । यही कारण क्षेत्रभित्र पनि उनको नेतृत्व क्षमताबारे सकारात्मक बहस हुँदै आएको देखिन्छ ।

यद्यपि, यो पहिलोपटक होइन कि डा. राणा कैलाली ५ बाट चुनावी प्रतिस्पर्धाको केन्द्रमा आएकी हुन् । यसअघि भएको निर्वाचनमा उनी नारदमुनि रानासँग पराजित भएकी थिइन् । तर, यसपटक स्थानीय नेतृत्व र कार्यकर्ता स्तरमा उनको प्रस्तुतिलाई नयाँ ऊर्जा र अवसरको रूपमा लिइएको कांग्रेस निकट स्रोतहरू बताउँछन् ।

कैलाली क्षेत्र नम्बर ५ का काँग्रेस नेताहरूले छिट्टै आधिकारिक रूपमा नाम सिफारिस गर्ने तयारी थालेको पनि स्रोतले जनाएको छ । चुनाव मिति नजिकिँदै जाँदा क्षेत्र नम्बर ५ को राजनीतिक वातावरण चर्किँदै गएको छ भने डा. आराजु राणाको सम्भावित उम्मेदवारीले कांग्रेसभित्र नयाँ उत्साह सिर्जना गरेको काँग्रेस स्रोत बताउछ ।