धनगढी, ४ मंसिर / लोटस आई स्कूल अत्तरियाको आयोजनामा तथा बोल्न्या थली, दक्षिण एसियाई युवा परिषद (SA8+1) र वर्ल्ड युथ फर क्लाइमेट जस्टिस (WYCJ) सुदुरपश्चिम टिमको सहकार्यमा सञ्चालन भएको ३ दिने नमूना संसद अभ्यास कार्यक्रम सफलतापूर्वक सम्पन्न भएको छ।

युवाहरूलाई संसदीय अभ्यासबारे बुझाउने, संघीयता कार्यान्वयनसम्बन्धी मूलभूत ज्ञान प्रदान गर्ने, संविधान र कानुनको महत्वबारे जागरूकता फैलाउने उद्देश्यले आयोजना गरिएको कार्यक्रममा सुदुरपश्चिम प्रदेश सभा सदस्य माननीय रमेश धामी प्रमुख अतिथि रहनुभएको थियो।

कार्यक्रममा प्रशिक्षकका रूपमा देव राज अवस्थी, गणेश जोशी, आकाश खड्का, प्राप्ति भट्ट, मनोज पुन मगर, सुनिता भट्ट र पदम बहादुर साउदले प्रशिक्षण दिनुभएको थियो।

करिब ९१ जना विद्यार्थीको सहभागिता रहेको कार्यक्रममा दक्षिण एसियाई युवा परिषद (SA8+1) मार्फत उत्कृष्ट अनुसन्धान, उत्कृष्ट वक्ता र उत्कृष्ट नेतृत्वकर्ता गरी तीन विधामा उत्कृष्ट प्रतिभालाई पुरस्कार वितरण गरिएको आयोजकले जनाएको छ।

कार्यक्रमले युवाबीच संसदीय संस्कार, नेतृत्व सीप र नीति निर्माण प्रक्रियाप्रति समझ बढाउने विश्वास लिइएको छ।