धनगढी ।महाकाली कोरिडोर (ब्रह्मदेव–झुलाघाट–दार्चुला–टिङ्कर सडक) योजना अन्तर्गत पर्ने दार्चुला जिल्लामा ३० किलोमिटर सडक कालोपत्रे गर्ने काम सुरु भएको छ । यहाँको कालोपत्रे गरिने सडकखण्डलाई तीन प्याकेजमा विभाजन गरेर कालोपत्रे गर्नुपूर्व गरिने काम सुरु गरिएको हो ।

योजनाका सूचना अधिकारी एवं इन्जिनियर रामचन्द्र जैसीका अनुसार दार्चुला जिल्लामा पर्ने सलेतीदेखि बेतखण्डको १२.३ किलोमिटर र खलङ्गादेखि सुन्सेरा खण्डको १८.५ किलोमिटर सडकखण्डमा ब्याक कटिङ, भुइँ तह, सहायक तह र मुख्य आधार तह निर्माण गर्ने कार्य सुरु गरिएको छ । ४९ करोड १० लाख १३ हजार ७१३ रुपियाँमा २०७९ साल असार २० गते निर्माण कम्पनीसँग सम्झौता गरिएको हो । सो सडकको यस वर्षदेखि कालोपत्रेको काम सुरु भएको उहाँले बताउनुभयो ।

सलेतीदेखि बेतसम्मको सडक कालोपत्रे गर्ने काम राजेन्द्र निर्माण सेवाले गरिरहेको छ भने खलङ्गादेखि चल्लेगडा खण्ड र चल्लेगडादेखि सुन्सेरासम्मको सडकखण्ड कालोपत्रे गर्ने काम सिएबी ग्वाल्लेक जेभीले गरिरहेको उहाँले जानकारी दिनुभयो ।

चल्लेगडा–सुन्सेरा सडकखण्ड कालोपत्रे गर्नका लागि ४२ करोड ६८ लाख ४० हजार ७३३ रुपियाँको ठेक्का टेन्डर भएको उहाँले बताउनुभयो । सलेती–बेत सडकखण्डमा ५३ प्रतिशत, खलङ्गा–चल्लेगडा सडकखण्डमा ५६ प्रतिशत र चल्लेगडा–सुन्सेरा सडकखण्डमा २५ प्रतिशत भौतिक प्रगति भएको पनि उहाँले बताउनुभयो ।

चालु आर्थिक वर्ष २०८२/८३ मा १० किलोमिटर सडक कालोपत्रे गर्ने लक्ष्य रहेको तथा बजेट न्युन रहेको उहाँले बताउनुभयो । कार्यालयलाई यस वर्ष २२ करोड ९७ लाख रुपियाँ विकास बजेट प्राप्त भएको बताइएको छ । कार्यालयलाई एक अर्ब ४९ करोड ठेक्का दायित्व रहेको उहाँले बताउनुभयो ।

कोरिडोरले कञ्चनपुरको ब्रह्मदेवदेखिमहाकाली किनार हुँदै डडेलधुराको परशुराम नगरपालिका, भागेश्वर गाउँपालिका, बैतडीको शिवनाथ गाउँपालिका, पञ्चेश्वर गाउँपालिका, दशरथचन्द नगरपालिका, दोगडाकेदार गाउँपालिका र दार्चुलाको लेकम गाउँपालिका, मालिकार्जुन गाउँपालिका, महाकाली नगरपालिका, दुहुँ गाउँपालिका हुँदै ब्यास गाउँपालिकाको टिङ्कर नाकासम्म छोएको छ ।