धनगढी, ८ असोज /  चाडपर्वलाई लक्षित गर्दै सुदूरपश्चिम प्रदेशमा शान्ति–सुरक्षाका लागि ५ हजार ७७ प्रहरी परिचालन गरिएको छ । प्रदेश प्रहरी कार्यालयले हालैको जेनजी आन्दोलनको क्रममा कारागारबाट ठूलो संख्यामा कैदीबन्दी फरार भएको घटनालाई ध्यानमा राखी फरक रणनीति सहित विशेष सुरक्षा योजना कार्यान्वयनमा ल्याएको हो ।

प्रदेश प्रहरी कार्यालयका अनुसार प्रहरी नायब महानिरीक्षक (डिआइजी) र प्रहरी वरिष्ठ उपरीक्षक ९एसएसपी० को कमाण्डमा प्रदेशस्तरमा, र जिल्लास्तरमा प्रहरी उपरीक्षक तथा नायब उपरीक्षकको कमाण्डमा सुरक्षा व्यवस्था मिलाइएको छ ।

प्रहरी वरिष्ठ उपरीक्षक तथा सूचना अधिकारी प्रकाश रानाभाटका अनुसार चाडपर्वमा सवारी दुर्घटना न्यूनीकरणका लागि मापसे चेकजाँच कडाइका साथ संचालन गरिनेछ । साथै, कैदी फरारसँगै उत्पन्न सुरक्षा चुनौतीलाई नियन्त्रण गर्न सीमा क्षेत्रमा भारतीय सुरक्षाकर्मीहरूसँग समन्वय गरी विशेष निगरानी राखिएको छ ।

फरार कैदी पक्राउका लागि प्रत्येक जिल्लाका प्रहरी कार्यालयलाई सर्कुलर पठाइएको छ । त्यस्तै, यात्रु सहजताका लागि प्रदेशभर ६५ वटा यात्रु सहायता कक्ष स्थापना गरिएको छ, जसमा २०९ जना प्रहरी खटाइएको प्रदेश प्रहरी कार्यालयले जनाएको छ ।