धनगढी, ८ असोज / सुदूरपश्चिमका अधिकांश सुनसान गाउँ बस्तीहरूमा चहलपहल बढेको छ। नेपालीहरूको मुख्य चाडपर्व दशैं, तिहार नजिकिए सँगै कर्मभूमिमा गएकाहरु जन्मभूमिमा फर्किन थाले पछि सुदूरका बस्तीहरूमा चहलपहल बढेको हो।

विशेषगरी सुदूरपश्चिमका सात पहाडी जिल्ला बैतडी, दार्चुला डडेलधुरा ,बझाङ , डोटी, अछाम र बाजुराका मान्छे बिहिन गाउँहरुमा पनि मान्छे देखिन थालेका छन्। दशैंको बेला विभिन्न शक्तिपीठहरूमा हुने जात्राहरूले गर्दा पनि पूजा आराधना गर्न अधिकांश मान्छेहरू गाउँमा जाने गरेको देखिन्छ।

गाउँघरमा सामूहिक रूपमा जमरा राख्ने, सामूहिक रूपमा टीका जमरा लगाउने चलन भएकाले पनि अध्ययन, रोजगारी लगायत विभिन्न सिलसिलामा गाउँबाट बाहिरिएकाहरू पनि यतिबेला गाउँ फर्किने गरेकाले पनि गाउँ घरमा यतिबेला रमाइलो हुने गरेको बैतडी सूर्नयाका युवा विशाल भट्टले जानकारी दिए।

कुनैबेला मलामीसम्म नपाइने गाउँघरमा दशैं तिहारको समयमा भने, सहरहरूमा भन्दा बढी चहलपहल गाउँघरमा हुने गरेको दार्चुला शैल्यशिखरका युवा उमेश ओझाले जानकारी दिए।

सुदूरपश्चिमका सातवटै पहाडी जिल्लामा विभिन्न ठूला धार्मिक शक्तिपीठ भएकाले पनि यतिबेला भक्तजनहरूले सुदूरका गाउँबस्तीमा चहलपहल बढेको देखिन्छ।