धनगढी, माघ २३/ नेपाल विद्यार्थी संघ कैलालीले बैतडीको दोगडाकेदार गाउँपालिका–७ मा रहेको सनातन धर्म माध्यमिक विद्यालयकी छात्रा भागरथी भट्टको हत्या घटना छानविनको माग गरेका छन् ।

नेपाल विद्यार्थी संघ कैलालीका जिल्ला अध्यक्ष भेष बहादुर बमले विज्ञप्ति जारी गर्दै घटनाको निन्दा गरेका छन् । बुधवार घरबाट विद्यालय गएकी भागरथी साँझ घर नफर्केपछि खोजी गर्ने क्रममा बिहीबार बेलुकी ५ बजेतिर मृत अवस्थामा फेला परेकी थिइन् । परिवारजनले उनको बलात्कारपछि हत्या गरिएको आशंका गरेको छ ।

“घटनाको सत्यतथ्य छानविन गरि सारा मानवीय मूल्य मान्यतामाथि चुनौती खडा गर्ने यस्तो हिंस्रक र आपराधिक घटनामा संलग्न दोषीलाई छिटोभन्दा छिटो कानुनी कठघरामा उभ्याइ हदै सम्मको कारबाहीका लागि सम्बन्धित निकायसँग जोडदार माग गर्दछौं,” विज्ञप्तिमा भनिएको छ ।