धनगढी, पुस २५/ सहकारीहरुले अब बचत र ऋण प्रवाह मात्रै गर्ने नभई कृषि क्षेत्रमा पनि लगानी बढाउनु पर्ने समय आएको राष्ट्रिय सहकारी महासंघका पूर्व सञ्चालक तथा जिल्ला सहकारी संघ लिमिटेडका सल्लाहकार समिति संयोजक भोजबहादुर बमले बताएका छन् ।
शनिबार धनगढीमा लक्ष्मी बचत तथा ऋण सहकारी संस्था लिमिटेडको ११ औं वार्षिक साधारण सभामा प्रमुख अतिथिको आसनबाट बोल्दै पूर्व सञ्चालक बमले सो कुरा बताएका हुन् ।
उनले भने,‘हामीले अब ऋण र बचत प्रवाहमा मात्रै ध्यान दिने हैन, कृषिका क्षेत्रमा लगानी गर्नुपर्छ ।’ नेपालमा अहिले पनि खाद्यान्न लगायतका खाद्य सामग्रीहरु बाहिरबाट आयात भइरहेको बताउँदै उनले भने,‘कृषिमा भइरहेको खाद्य संकट टार्न र किसानलाई कृषिमा उत्प्रेरणा जगाउन पनि सहकारीले कृषि क्षेत्रमा लगानी लगाउनु पर्ने समय आएको छ ।’ आर्थिक समृद्धिबिना राष्ट्रको समृद्धि हुन नसक्ने बताउँदै उनले भने,‘सहकारीमार्फत् कृषि क्षेत्रमा लगानी बढाउँदा आर्थिक समृद्धि सहजै प्राप्त हुन्छ ।’
५० जना शेयर सदस्यले २५ लाख शेयर पुँजीबाट सुरु गरेको लक्ष्मी बचत तथा ऋण सहकारी संस्था लिमिटेडको अहिले १ करोड ६४ लाख ३६ हजार पाँच सय रुपैयाँ शेयर पुँजी रहेको छ । संस्थाका अध्यक्ष राकेशमान कर्माचार्यको अध्यक्षतामा भएको ११ औं साधारण सभामा अध्यक्षले वार्षिक प्रतिवेदन प्रस्तुत गरेका थिए । कार्यक्रममा धनगढी उपमहानगरपालिकाको सहकारी फाँटका प्रमुख हरिसिंह साउँदलगायतका व्यक्तिहरुको सहभागिता रहेको थियो ।
