एजेन्सी– करण जौहरको फिल्म ‘कलंक’ को असफलतापछि बलिउड अभिनेत्री आलिया भट्ट ‘सडक २’ को सुटिङको तयारीमा जुटेकी छिन्। यो फिल्मलाई आलियाले निकै महत्वका साथ हेरेकी छिन्।

२८ वर्षअघि सुपरहिट भएको रोमान्टिक फिल्म ‘सडक’ को सिक्वेल हो सडक २। यो फिल्ममार्फत आलिया पहिलो पटक आफ्ना पिता महेश भट्टको निर्देशनमा काम गर्दैछिन्।

सडक २ मा आलियाका साथै आदित्य राय कपुर, सञ्जय दत्त र पूजा भट्टले पनि अभिनय गर्नेछन्। सन् १९९१ मा बनेको फिल्म सडकमा आलियाकी दिदी पूजा र सञ्जयले मुख्य भूमिका निर्वाह गरेका थिए।

सडक २ मा आलियाले निभाउने भूमिका बारेमा पनि केही खुलासा भएको छ। समाचार अनुसार सर्वसाधारणलाई झुक्याएर आश्रम चलाउने नक्कली गुरुको चरित्र उदांगो पार्ने भूमिकामा आलिया छिन्। यो काममा सञ्जयले आलियालाई सघाउँछन्।

नक्कली गुरुको भूमिकामा अभिनय गर्ने कलाकारको बारेमा भने निर्देशक भट्टले केही बताउन चाहेनन्। उनले सञ्चारकर्मीसँग भने, ‘यसका लागि एक्टरको कास्टिङ जारी छ, केही समयमै सार्वजनिक हुन्छ।’