काठमाडौं, १४ पुस । काठमाडौंको नयाँ बसपार्कमा एक महिलालाई ९ जनाले सामूहिक बलात्कार गरेका छन्। काठमाडौं महानगरीय प्रहरी परिसरका अनुसार ३४ वर्षीया महिलालाई मंगलबार रातभर सामूहिक बलात्कार गरिएको हो।

नयाँ बसपार्कस्थित एउटा गेस्ट हाउसमा लगेर ती महिलालाई सामूहिक बलात्कार गरिएको हो। यसैबीच प्रहरीले पीडितको उजुरीका आधारमा नयाँ बसपार्क क्षेत्रका विभिन्न स्थानबाट ८ जनालाई पक्राउ परेको छ।

पीडित पक्षले दिएको उजुरीमा पीडक ९ जनाको नाम छ। जसमा अझै एक जना पक्रिन बाँकी छ। काठमाडौं प्रहरी परिसरका प्रवक्ता दिनेश मैनालीका अनुसार ७ जनालाई मंगलबार राति र एक जनालाई बुधबार बिहान पक्राउ गरिएको हो।​

‘आठ जना पक्राउ गरिसकेका छौं, अर्का एक जना फरार छन्, खोजी गरिरहेका छौं,’ प्रवक्ता मैनालीले बुधबार बिहान  भने, ‘घटनाबारे थप अनुसन्धान भइरहेको छ।’

पक्राउ परेका व्यक्तिमा ७ जना मुगु जिल्लाका मात्रै छन्। एक जना अर्घाखाँचीका हुन्। पीडित महिला सुर्खेतको भएको खुलेको छ। उनका श्रीमान भारतमा रहेको खुल्न आएको प्रहरीले जनाएको छ।

प्रहरीका अनुसार पक्राउ परेका पुरुष १९ देखि ४३ वर्षसम्मका छन्। अर्का एक जना फरार छन्। ती व्यक्तिको खोजी र घटनाबारे थप अनुसन्धान भइरहेको प्रहरीले जनाएको छ।पीडित महिलाको स्वास्थ्य परीक्षण गरिएको र उनको अवस्था सामान्य रहेको प्रहरीले जनाएको छ।