धनगढी- नेपाल आदिवासी जनजाति पत्रकार महासंघ (फोनिज) कैलाली शाखाले १ लाख धनराशीको अक्षयकोष स्थापना गर्ने घोषणा गरेको छ । फोनिजको २० औं स्थापना दिवसको अवसरमा सो शाखाले सोमबार धनगढीमा आयोजित एक कार्यक्रमकाबीच अक्षयकोष स्थापना गर्ने घोषणा गरेको हो ।

अक्षयकोष अन्तर्गत बैंक मुद्दती खाताबाट वार्षिक रुपमा आउने ब्याज रकमबाट आदिवासी जनजाति पत्रकारहरूको क्षमता विकास, आपतकालीन सहयोगमा खर्च गरिने फोनिज कैलाली अध्यक्ष लखन चौधरीले जानकारी दिए ।

सो अवसरमा सो शाखाले नेपाल पत्रकार महासंघ कैलाली शाखालाई १ दर्जन प्लाष्टिक कुर्सी सहयोग गरेको छ । महासंघको कार्यालय व्यवस्थापनमा सहयोग पुगोस् भन्ने उदेश्यका साथ कुर्सी सहयोग गरेको हो । फोनिज अध्यक्ष चौधरीले महासंघ कैलाली अध्यक्ष जगत साउँदलाई कुर्सी हस्तान्तरण गरेका थिए ।

फोनिज कैलाली अध्यक्ष चौधरीले भने–‘हामीले गत आर्थिक वर्षमा कैलालीको कैलारी गाउँपालिकासहित केही स्थानीय तह संग सहकार्य गरी कार्यक्रम गरेका थियौ । कार्यक्रमको खाजा खर्चलाई कटौती गरी अक्षय कोष र महासंघलाई सानो सहयोग गर्ने प्रयत्न गरेका हौ ।’

सञ्चारमा समावेशिता

‘सञ्चारमा समावेशिता कानूनमा चाहियो, व्यवहारमा पनि’ भन्ने मूल नाराका साथ शाखा अध्यक्ष चौधरीको अध्यक्षतामा भएको कार्यक्रमको प्रमुख अतिथि नेपाल पत्रकार महासंघ सुदूरपश्चिम अध्यक्ष अर्जुन शाह रहेका थिए ।

कार्यक्रममा बोल्दै अध्यक्ष शाहले प्रदेश सरकारको सञ्चार नीति समावेशिताको सिद्धान्त अनुरुप ल्याउनुपर्नेमा पत्रकार महासंघले सम्बन्धित पक्षलाई दवाव सिर्जना गर्दै आएको बताए । सञ्चार नीति आएपछि त्यसै अनुसार सञ्चारगृहभित्र पनि समावेशिता लागू हुने र सवैपक्षको सवाल समेटिनेमा उनको जोड थियो ।

फोनिजका केन्द्रीय सल्लाहकार गणेश चौधरीले सञ्चारगृहभित्र समावेशिता नहुँदा भाषा, संस्कृति, परम्परावारे पूर्ण जानकारी नहुने भएकाले स्वयम सञ्चारगृहलाई नै अप्ठेरो हुँदै आएको बताए । साथै गलत सूचना सम्प्रेषण पनि भैरहेकोले सञ्चारको विकासको लागि सञ्चारगृह समावेशी हुन जरुरी रहेको केन्द्रीय सल्लाहकार चौधरीको भनाइ थियो ।

नेपाल आदिवासी जनजाति महासंघ सुदूरपश्चिम अध्यक्ष दलबहादुर घर्तिमगरले राज्यका अंगहरूका साथै सञ्चारगृहहरू समेत समावेशी नहुँदा आदिवासी जनजातिलगायत सीमान्तकृत समुदायको मुद्धा तथा सवालहरू ओझेलमा पर्दै आएको बताए । मुलुकको सन्तुलित विकासको लागि भएपनि हरेक अंगहरू समावेशी गर्नुपर्ने जरुरी रहेको अध्यक्ष घर्तिमगरको जोड थियो ।

कार्यक्रममा सहभागी पत्रकारहरूले सुदूरपश्चिमस्थित सञ्चारगृह समावेशी बनाउन जनजाति पत्रकारहरूको सख्यात्मक वृद्धिसँगै क्षमता विकास जरुरी रहेको औल्याए । जसको लागि फोनिजसहित सम्बन्धित पक्षले ध्यान दिनुपर्नेमा जोड दिए ।

कार्यक्रममा नेपाल पत्रकार महासंघ कैलाली शाखा अध्यक्ष जगत साउँद, महासंघका पूर्वकेन्द्रीय उपाध्यक्ष उमिद बागचन, महासंघका पूर्व सुदूरपश्चिम संयोजक मनमोहन स्वाँर, दिलबहादुर छत्याल, कर्ण शाह, थारु नागरिक समाज कैलाली संयोजक दिलबहादुर चौधरी, थारु कल्याणकारिणी सभा कैलालीका कार्य बाहक सभापति माधव चौधरी, पत्रकार शिवराज भट्ट, फोनिज पूर्व जिल्ला अध्यक्ष अनत चौधरी, हेमन्त पौडेललगायत शुभकामना मन्तव्य गरेका थिए । फोनिज जिल्ला सदस्य प्रेमलाल चौधरीले स्वागत मन्तव्य गरेको कार्यक्रमको सञ्चालन जिल्ला सचिव राम दहितबाट भएको थियो ।