धनगढी, २० माघ । नेकपा (एमाले) निकट युवा संघ जिल्ला कमिटी बाजुराले जिल्ला अस्पताल बाजुरामा एमडीजीपी डाक्टरको व्यवस्था गर्न माग गर्दै ध्यानाकर्षण पत्र बुझाएको छ। युवा संघका सचिव विष्णु कार्कीका अनुसार उक्त पत्र जिल्ला अस्पताल बाजुराका निमित्त मेडिकल सुपरिटेन्डेन्ट डा। शेखरचन्द्र यादवलाई हस्तान्तरण गरिएको छ।

ध्यानाकर्षण पत्रमा जिल्ला अस्पतालमा अनिवार्य रूपमा एमडीजीपी डाक्टरको दरबन्दी कायम गरी तत्काल व्यवस्थापन गर्नुपर्ने, बालरोग विशेषज्ञको व्यवस्था मिलाउनुपर्ने, साथै विशेषज्ञ डाक्टर, नर्स तथा स्वास्थ्यकर्मीलाई उचित सुविधाको सुनिश्चितता गर्नुपर्ने माग गरिएको छ।

स्वास्थ्य सेवामा आधुनिक उपकरणको व्यवस्था गरी नेपाल सरकारले निःशुल्क प्रदान गर्ने सबै प्रकारका औषधीको आपूर्ति सुनिश्चित गर्नुपर्ने विषयसमेत पत्रमा उल्लेख गरिएको छ। साथै, सामान्य बिरामीलाई समेत जिल्ला बाहिर रेफर गर्नुपर्ने बाध्यताको अन्त्य गर्दै स्थानीयस्तरमै उपचारको व्यवस्था मिलाउनुपर्ने माग युवा संघले गरेको छ।

बाजुरामा विशेषज्ञ डाक्टरको अभावका कारण सामान्य सर्जरी, सुत्केरी उपचार लगायतका बिरामीहरूलाई महँगो एम्बुलेन्स भाडा तिरेर लामो बाटो पार गर्दै अन्य स्थानमा जानुपर्ने अवस्था रहेको युवा संघको भनाइ छ।

ध्यानाकर्षण पत्र बुझ्दै जिल्ला अस्पताल बाजुराका निमित्त मेडिकल सुपरिटेन्डेन्ट डा. शेखरचन्द्र यादवले समस्या समाधानका लागि पहल भइरहेको जानकारी दिएका छन्। साथै, यस विषयमा संघीय मन्त्रालयसँग माग गरिएको र जिल्ला स्तरका राजनीतिक दल तथा सरोकारवाला निकायहरूसँग छलफल गरिने प्रतिक्रिया दिएका छन्।