धनगढी,१८ मंसिर । कञ्चनपुरमा बाघले आक्रमण गर्दा एक जना घाईते भएका छन । जिल्लाको दोधारा–चाँदनी नगरपालिका–२ सरस्वती टोलका ६३ वर्षीय शेरसिंह साउँदमाथि बाघले आक्रमण गरेको हो ।

सोमबार बिहान गाँउकै मायापुरी जंगलमा गाईभैंसी चराउन गएको समयमा उनलाई आक्रमण गरेर घाइते बनाएको जिल्ला प्रहरी कार्यालय कञ्चनपुरका प्रवक्ता उमेशराज जोशीले जानकारी दिए ।

बाघको आक्रमणबाट घाइते भएका साउँदको चिउडो र हातमा गम्भिर घाउ भएको छ । घाइते साउँदको दोधारा–चाँदनी नगर अस्पतालमा उपचार हुन नसकेपछि महाकाली प्रादेशिक अस्पताल महेन्द्रनगरमा उपचार भइरहेको प्रहरी बताएको छ ।

गत साउन १७ गते मात्रै बाघकै आक्रमणबाट दोधारा–चाँदनीकी २३ वर्षीया हिरा शाहको मृत्यु भएको थियो । सोमबार पुनः बाघकै आक्रमणबाट साउँद घाइते भएर अस्पताल नै भर्ना भएपछि गाउँमा त्रास बढेको स्थानीयले बताएका छन् ।