धनगढी, ३ जेठ /   सरकारले कामदारको न्यूनतम पारिश्रमिकसम्बन्धी मापदण्ड बनाएको भए पनि त्यसको पूर्ण कार्यान्वयन अझै हुन सकेको छैन । विशेषगरी यातायात क्षेत्रका मजदुरहरूले न्यूनतम पारिश्रमिकसँगै सामाजिक सुरक्षा कोषमा आबद्ध नगराइएको भन्दै आपत्ति जनाएका छन् । सुदूरपश्चिमका यातायात मजदुरहरूले राज्यले तोकेको न्यूनतम पारिश्रमिक उपलब्ध गराउनुका साथै सबै मजदुरलाई योगदानमा आधारित सामाजिक सुरक्षा कोषमा अनिवार्य रूपमा आबद्ध गराउन माग गरेका छन् ।

मजदुर नेतृत्वले मजदुरको सुरक्षा, सम्मान र श्रम अधिकार सुनिश्चित गर्न सरकार तथा व्यवसायी गम्भीर नभएको गुनासो गरेका छन् । यातायात क्षेत्रमा कार्यरत मजदुर र उनीहरूको परिवारको सुरक्षाका लागि सबै मजदुरलाई सामाजिक सुरक्षा कोषमा आबद्ध गराउन आवश्यक रहेको नेपाल यातायात स्वतन्त्र मजदुर संगठन सुदूरपश्चिम प्रदेश अध्यक्ष ललित चन्दले बताए । उनले मजदुरहरूले अझै पनि न्यूनतम पारिश्रमिक, बीमा तथा सामाजिक सुरक्षाको सुविधा नपाएको गुनासो गरे ।

नेपाल ट्रेड युनियन महासंघ ९जिफन्ट० सुदूरपश्चिम अध्यक्ष जितबहादुर मल्लले यातायात क्षेत्रसँगै सबै क्षेत्रका मजदुरलाई सामाजिक सुरक्षा कोषमा आबद्ध गराउनुपर्ने बताए । उनले कोषमा आबद्ध हुँदा मजदुर र व्यवसायी दुवैलाई दीर्घकालीन लाभ पुग्ने उल्लेख गर्दै यसको कार्यान्वयन अनिवार्य हुनुपर्ने धारणा राखे । नेपाल यातायात स्वतन्त्र मजदुर संगठनका केन्द्रीय अध्यक्ष भिम ज्वाला राईले चालक तथा सहचालकको सम्मान, सुरक्षा र अधिकार सुनिश्चित नगरी यातायात क्षेत्रको सुधार सम्भव नहुने बताए । उनले योगदानमा आधारित सामाजिक सुरक्षा कोषमा मजदुर र मालिक दुवैले नियमित योगदान गर्नुपर्ने उल्लेख गर्दै यातायात नीति परिमार्जन, सडक सुरक्षा नीति लागू तथा व्यवहारिक सुधार आवश्यक रहेको धारणा राखे ।

मजदुर नेतृत्वले यातायात क्षेत्रमा कार्यरत मजदुर अझै असुरक्षित अवस्थामा काम गर्न बाध्य रहेको बताएका छन् । न्यूनतम पारिश्रमिक कार्यान्वयन, सामाजिक सुरक्षा कोषमा अनिवार्य आबद्धता तथा सुरक्षित र सम्मानजनक कार्य वातावरण सुनिश्चित गर्न सरकार र सम्बन्धित निकायले प्रभावकारी कदम चाल्नुपर्नेमा मजदुर नेतृत्वको जोड छ ।

कार्यक्रममा ढुवानी व्यवसायी खगेश्वर बोहराले आफ्नै संस्थाबाट सामाजिक सुरक्षा कोषमा आबद्धता सुरु गर्ने प्रतिबद्धता व्यक्त गरे । कार्यक्रममा नेपाल यातायात ब्यवसायी राष्टिय महासघंका केन्द्रिय उपाध्यक्ष डम्मर पन्त, सुदुरपश्चिम सयोंजक टेकराज जोशी, सुदुरपश्चिम यातायात प्रा।लीका अध्यक्ष पदम सापकोटा लगायतले सुभकामना मन्तब्य राखेका थिए ।