बैठकमा प्रदेश संयोजक ठगुन्नाले समग्र राजनीतिक अवस्थाबारे प्रारम्भिक जानकारी गराएका थिए भने त्यसपछि अध्यक्ष जैशीले पार्टीभित्रको गतिविधि र चुनौतीबारे धारणा राखेका थिए। त्यसपश्चात अध्यक्ष ओलीले प्रदेशसभा सदस्यहरूको धारणा सुनेका थिए।

सार्वजनिक रूपमा संसदीय दलको नेता परिवर्तनको चर्चा भइरहेका बेला अधिकांश सांसदहरूले भने तत्काल नेतृत्व परिवर्तन उपयुक्त नहुने धारणा राखेका थिए। उपनेता सन्तोष शर्मा र प्रमुख सचेतक चक्र मल्लले नेता परिवर्तनको आवश्यकता औंल्याए पनि अधिकांश सांसद त्यसको विपक्षमा उभिएका थिए। सांसद धर्मराज पाठकले अहिलेको अवस्थामा नेतृत्व परिवर्तनले राम्रो सन्देश नजाने बताएका थिए। यद्यपि परिवर्तन आवश्यक परे युवापुस्ताको प्रतिनिधित्वका लागि आफू उपयुक्त हुन सक्ने उनको भनाइ थियो।

बैठकमा सहभागी एक नेताका अनुसार ११ सांसदमध्ये तीन जना मात्रै परिवर्तनको पक्षमा देखिएका थिए। त्यसपछि तत्काललाई संसदीय दलको नेता परिवर्तनको बहस लगभग टुङ्गिएको संकेत देखिएको स्रोतले जनाएको छ।

छलफलका क्रममा सरकारमा सहभागी मन्त्रीहरूको भूमिकाबारे पनि चर्चा भएको थियो। एमालेबाट सरकारमा सहभागी तीन मन्त्री र एक राज्यमन्त्रीको कार्यशैली तथा भविष्यमा आलोपालोको सम्भावनाबारे केही सांसदहरूले अध्यक्ष ओलीसमक्ष सुझाव राखेका थिए। तर त्यस विषयमा कुनै ठोस निर्णय नभएको बताइएको छ।

अध्यक्ष ओलीले पार्टीभित्रको एकता, संगठन सुदृढीकरण र आगामी निर्वाचन तयारीमा जोड दिएका थिए। उनले चुनावी परिणाम अपेक्षाअनुसार नआएको भन्दै कारणहरूको समीक्षा गर्न र गाउँ तहदेखि नै संगठन बलियो बनाउन निर्देशन दिएका थिए। “एमाले अहिले एकताबद्ध हुनु आवश्यक छ। विभिन्न प्रकारका दबाब र प्रहार भइरहेका बेला विभाजनको सन्देश जानु राम्रो होइन,” ओलीको भनाइ उद्धृत गर्दै एक सहभागीले बताए।

छलफलको अन्त्यमा अध्यक्ष ओलीले कुनै औपचारिक निर्णय भने सुनाएनन्। उनले थप संवादका लागि लेखराज भट्ट, गणेशसिंह ठगुन्ना, कृष्णप्रसाद जैशी र संसदीय दलका नेता राजेन्द्रसिंह रावललाई पुनः छलफलका लागि बोलाएका छन्।

स्रोतका अनुसार अब ओलीको ध्यान सरकारको समीकरण र मन्त्री हेरफेरतर्फ केन्द्रित भएको छ। भोलि हुने छलफलपछि सुदूरपश्चिम प्रदेश सरकारमा मन्त्री परिवर्तन हुने वा नयाँ समीकरण बन्ने विषयमा टुङ्गो लाग्न सक्ने बताइएको छ।