कैलाली १६, पुस /  सुदूरपश्चिम प्रदेशका मुख्यमन्त्री कमलबहादुर शाह र सुदूरपश्चिम प्रदेश प्रहरी प्रमुख ओमप्रकाश राना (डिआइजी) बीच आज भेटघाट भएको छ।

बुधबार मुख्यमन्त्री निवासमा भएको भेटमा मुख्यमन्त्री शाहले प्रदेशमा बढ्दो लागू औषध दुरुपयोग नियन्त्रण तथा निरुत्साहित गर्न प्रभावकारी कदम चाल्न प्रहरी प्रमुख रानालाई निर्देशन दिनुभएको छ।

भेटका क्रममा मुख्यमन्त्री शाहले लागू औषधले युवापुस्तामा नकारात्मक प्रभाव पारिरहेको उल्लेख गर्दै यसको नियन्त्रणमा प्रदेश प्रहरीको भूमिकालाई अझ सशक्त बनाउन आवश्यक रहेको बताउनुभयो। साथै उहाँले प्रदेशको समग्र शान्ति सुरक्षा अवस्थाबारे जानकारी लिँदै सुरक्षा व्यवस्थालाई थप सुदृढ बनाउने विषयमा छलफल गर्नुभएको थियो।

प्रहरी प्रमुख रानाले लागू औषध नियन्त्रण तथा शान्ति सुरक्षाका क्षेत्रमा प्रदेश प्रहरी सक्रियताका साथ कार्य गरिरहेको जानकारी गराउँदै मुख्यमन्त्रीको निर्देशनलाई कार्यान्वयन गर्ने प्रतिबद्धता व्यक्त गर्नुभयो।