काठमाडौँ, २८ वैशाख । नेपाल दूरसञ्चार कम्पनी लिमिटेड (नेपाल टेलिकम)को नाफा १ अर्ब बढीले घटेको छ।चालू आर्थिक वर्षको माघ, फागुन र चैत महिनामा टेलिकमले १ अर्ब ५३ करोड रुपैयाँ मात्रै आम्दानी गरेको हो।

टेलिकमले अघिल्लो वर्षको सोही अवधिमा २ अर्ब ५९ करोड रुपैयाँ बढी नाफा गरेको थियो।वार्षिक रुपमा भने ४५ करोड रुपैयाँ नाफा कम छ। अघिल्लो वर्ष चैतसम्म ५ अर्ब ८८ करोड रुपैयाँ नाफा गर्दा चालू आर्थिक वर्षको चैतसम्म ५ अर्ब ४३ करोड रुपैयाँ नाफा गरेको छ।

टेलिकमको कर तिर्नुअघिको नाफा करिब ३ अर्ब रुपैयाँ रहेको थियो। अघिल्लो वर्ष ३ अर्ब ७२ करोड थियो। साउनदेखि चैतसम्म टेलिकमको करबाहेक नाफा ८ अर्ब ४९ करोड रुपैयाँ छ।

अघिल्लो वर्ष ८ अर्ब ९१ करोड रुपैयाँ थियो।

चालू आर्थिक वर्षमा प्रतिसेयर आम्दानी ४०.२६ रुपैयाँ रहेको छ। दोस्रो बजारमा नेपाल टेलिकमको सेयर मूल्य १७ सय ९९ रुपैयाँ पुगेको थियो भने सबैभन्दा कम १ हजार २८ रुपैयाँमा झर्यो। ३७ हजार ८९९ वटा कारोबार हुँदा ५३ लाख ८९ हजार ८९९ कित्ता सेयर खरिदबिक्री भए।

कम्पनीको सेयर पुँजी १८ अर्ब, सञ्चिति र बचत ७४ अर्ब ११ करोड रहेको छ। नेपाल दूरसञ्चार प्राधिकरणको कुल सम्पत्ति १ खर्ब ५३ अर्ब २० करोड रहेको छ। २०७८ असारमा १ खर्ब ४७ अर्ब ८१ रहेको थियो।