धनगढ,१ कार्तिक । बझाङको एउटा विमानस्थलको रनवेलाई स्थानियले आवतजावत गर्ने बाटो बनाएका छन ।

जिल्लाको देवल विमानस्थलको रनवेमा त्यहाका स्थानियहरुले दैनिक आवतजावत गर्ने गरेका हुन । उक्त विमानस्थलको रनवेमा हवाईजहाज अवतरण हुने बेलासम्म स्थानीयहरुले हिडडुल गर्ने गरिरहने गरेका छन् । त्यति मात्रै नभई स्थानीयले विमानस्थललाई धान, पराल बोक्ने मुख्य बाटोको रुपमा प्रयोग गर्दै आएका छन ।

विमानस्थल सुरक्षामा खटिएका सुरक्षाकर्मीले पनि चेकजाँचमा लापरवाही गर्ने गरेका छन । २३ जना सुरक्षा गार्डको दरबन्दी रहेकोमा ११ जना मात्र छन् । विमानस्थलमा स्थानीयलाई आवतजावतमा रोक लगाउन सुरक्षाकर्मीलाई आग्रह गरेपनि सुनुवाइ नभएको समिट एयरलाइन्स बझाङका स्टेसन प्रमुख हिक्मत सिंहले गुनासो गरे ।

विमानस्थलको घेरबारमा प्रयोग गरेको काँडे तारमा स्थानीयहरुले लुगा सुकाउने गरेको सिंहले बताए । धान, पराल, घाँस, पानीलगायत सामान पनि रनवे हुँदै ल्याउने गरेकाले घाँस, पराल, फुटेका चुराका टुक्रा रनवेमा खस्ने गरेको उनको भनाइ छ ।

‘विमानस्थलको रनवेमा स्थानीयहरु यसरी नै हिँड्डुल गर्ने र सुरक्षाकर्मीहरुले कडाइ नगर्ने हो भने हवाई सेवा बन्द गर्नु पर्ने अवस्था सिर्जना हुन्छ,’ उनले भने, ‘स्थानीयहरुलाई रनवे बाट जान रोक लगाउन अनुरोध गर्दा पनि सुरक्षाकर्मीले चासो नदिँदा सुरक्षा चुनौती थपिएको छ ।’
विमानस्थलको वेटिङ स्थलमा पनि गाईवस्तुहरु जाने गरेका छन ।

गत असारमा विमानस्थलका प्रमुख, सुरक्षा निकायका प्रमुख, प्रमुख जिल्ला अधिकारीलगायतको बैठकले विमानस्थलमा फोटो, भिडियो खिच्न नपाइने, अनुमतिविना विमानस्थलभित्र जान नपाउने निर्णयहरु गरेको थियो । तर, उक्त निर्णय हालसम्म कार्यान्वयन हुन सकेको छैन । स्थानीयलाई तलमाथि गर्न बैकल्पिक बाटो नहुँदासम्म रनवेमा हिँड्ने काम बन्द नहुने स्थानीय पवन धामी बताउँछन् ।

विमानस्थल सुरक्षाकर्मीका इन्चार्ज केशवदत्त भट्ट भने विमानस्थलमा लगाएको तारबार ठाउँठाउँमा मर्मत गर्नुपर्ने र हवाईजहाज आउने जाने समय निर्धारित हुने नभएकाले समस्या भएको बताउँछन् । यस्तै, उनले विमानस्थल प्रमुखलाई स्थानीयका लागि बैकल्पिक बाटो बनाउन अनुरोध गरे पनि सुनुवाइ नभएको बताए ।

‘प्लेन यति बेला आउँछ भन्ने टाइमटेबल हुँदैन’ उनले भने, ‘कहिलै गाउँतिर ड्युटीमा गएको अवस्थामा आउँछ । कहिले खाना खाने बेला आउँछ ।’

भट्टले सुरक्षामा दरबन्दी अनुसार सुरक्षाकर्मी खटाउनु पर्ने माग गरे पनि कुनै सुनुवाइ नभएको बताए । साथै, खटिएका सुरक्षाकर्मी बस्ने भवन जीर्ण भएकाले आफूहरु नै सुरक्षित नभएको गुनासो उनले गरे । ‘कहिले काहीँ राति भवनको पाखोबाट माटो र ढुंगा खस्छन्’ उनले भने, ‘जीर्ण भवनमा डराइडराइ बस्नु परेको छ ।’

जिल्ला प्रहरी कार्यालयका प्रमुख डिएसपी रुपक खड्काले विमानस्थलको घेरबार नभएको र हवाईजहाज कुन दिन कुन समयमा आउँछ भन्ने पनि जानकारी नभएका कारण समस्या भएको बताए । प्रहरी एक्लैले मात्रै विमानस्थलको सुरक्षा दिन नसक्ने भएकाले नागरिकले पनि विमानस्थल सुरक्षाको अपनत्व लिनु पर्ने उनको भनाइ छ ।

विमानस्थलका वरिष्ठ अधिकृत तथा विमानस्थल सुरक्षा समिति अध्यक्ष भानुभक्त आचार्यले भने सुरक्षाकर्मीको कार्य क्षेत्र बढेको र स्थानीयले प्रहरीलाई सहयोग नगर्दा सुरक्षामा चुनौती थपिएको बताए । उनले विमानस्थल घेरबारका लागि तारजालीको टेन्डर भैसकेको र सुरक्षाकर्मीहरुको भवनको लागि केन्द्रबाट काम अघि बढिसकेको जानकारी दिए ।