धनगढी, ३ असोज । कैलाली र कञ्चनपुरको राजमार्ग क्षेत्र सिसी क्यामेरा सञ्चालनमा आएका छन् । सुदूरपश्चिम प्रदेश आन्तरिक मामिला तथा कानून मन्त्रालयले पूर्वपश्चिम राजमार्गको चिसापानीदेखि गड्डाचौकी र अत्तरियादेखि त्रिनगर सीमानाकासम्म जडान गरेको सिसीटिभी क्यामेरा आजदेखि सञ्चालनमा ल्याइएको हो।

आइतबार इलाका प्रहरी कार्यालय अत्तरियामा एक कार्यक्रमको आयोजना गरी मन्त्रालयले कैलालीको पूर्वी क्षेत्र चिसापानीदेखि पूर्व–पश्चिम राजमार्गअन्तर्गत कञ्चनपुरको गड्डाचौकी नाकासम्म र अत्तरिया बजारदेखि त्रिनगर नाकासम्म जडान गरेका सीसी क्यामेरा प्रहरी लाई हस्तान्तरण गरेको हो ।

आन्तरिक मामिला तथा कानुन मन्त्री पूर्णा जोशीले कैलाली कञ्चनपुरका १३८ ठाउँमा जडान गरेका सीसी क्यामराको विस्तृत जानकारी सहित सुदूरपश्चिम प्रदेश प्रहरी कार्यालयका प्रमुख तथा प्रहरी नायव महानिरीक्षक पुरुषोत्तम कँडेललाई हस्तान्तरण गरेकी हुन् ।

प्रदेश सरकार अपराध तथा दुर्घटना न्यूनीकरण अभियान अन्तर्गत कैलालीको पूर्वी क्षेत्र चिसापानीदेखि पूर्व–पश्चिम राजमार्गअन्तर्गत कञ्चनपुरको गड्डाचौकी नाकासम्म र कैलालीको अत्तरिया बजारदेखि मोहन अत्तरिया छ लेन सडकअन्तर्गत त्रिनगर नाकासम्म १३८ स्थानमा सीसी क्यामेरा जडान गरिएको थियो ।

प्रदेश सरकारले जडान गरेको सीसी क्यामेराले आपराधिक क्रियाकलाप रोकिने अपेक्षा गरिएको छ । मन्त्री जोशीले सीसी क्यामरा जडानले आपराधिक क्रियाकलाप नियन्त्रण, सवार दुर्घटना न्यूनीकरण गर्न र सवारी दुर्घटनाको दोषी पक्राउ गर्न सहज हुने विश्वास व्यक्त गरिन् ।

सीसी क्यामेरा कैलाली कञ्चनपुरको बजार क्षेत्र, दुर्घटनाको जोखिम बढी भएको ठाउँ, राजमार्गमा धेरै व्यक्ति जमघट हुने चौराहा, दोबाटो, सार्वजनिक सम्पत्ति रहेको क्षेत्र, सरकारी कार्यालय रहेका क्षेत्रमा जडान गरिएका छन ।