धनगढी, ३ असोज । राष्ट्रपति विद्यादेवी भण्डारीले संविधान दिवसका अवसरमा विभिन्न क्षेत्रमा विशिष्ट योगदान पु¥याउने व्यक्तित्वलाई मान–पदवी, अलङ्कार र पदकद्वारा विभूषित गर्ने घोषणा गरेकी छन् ।

सुदूरपश्चिमका बरिष्ठ समाजसेवी श्याम सुन्दर तायललाई सुप्रबल जनसेवा श्री बिभुषण प्रदान गरिने भएको छ। सुदूरपश्चिमको शिक्षा,स्वास्थ्य तथा धार्मिक क्षेत्रको विकास अतुलनीय योगदान पुर्याए वाफत तायललाई सुप्रबल जनसेवा श्री बिभुषण प्रदान गर्ने निर्णय गरिएको हो ।

तायलको अगुवाईमा धनगढीमा शिवपुर धामको निर्माण भएको हो । उनले सुदूरपश्चिमका थुप्रै विद्यालयहरुको सञ्चालन तथा भौतिक पूर्बाधार निर्माणमा समेत सहयोग गरेका छन् ।

कोभिडको महामारी फैलिएपछि पहिलो चरणमा तायलको अगुवाईमा स्थापना भएको ह्युमानिटी फाउण्डेसनले भारतबाट आएका ३० हजारभन्दा बडि नेपालीलाई सीमा क्षेत्रमा निशुल्क खाना र पानी वितरण गरेको थियो भने डडेल्धुरामा एक करोड रुपैया भन्दा बढिको लागतमा पीसीआर प्रयोगशाला स्थापना गरेको थियो ।

त्यस्तै तायलको अगुवाईमा ह्युमानिटी फाउण्डेसनले कोरोना महामारीको दोस्रो लहरमा सुदूरपश्चिमका नागरिकहरुको जीवन रक्षाका लागि सरकारी अस्पतालहरुलाई निशुल्क अक्सिजन उपलब्ध गराएको थियो । त्यस्तै अक्सिजन बैंक मार्फत कोरोना संक्रमितहरुलाई सोझै निशुल्क अक्सिजन उपलब्ध गराउने कार्यको पनि तायलले नेतृत्व गरेका थिए ।