काठमाडौं। एक वर्षपछि नेपाल विद्युत प्राधिकरणको नेतृत्वमा कुलमान घिसिङ फिर्ता आएका छन्। उनलाई मंगलबार साँझ प्रधानमन्त्री कार्यालयबाट फोन गरेर बुधबार नियुक्तिपत्र लिन डाकिएको छ।

कुलमानले बुधबार नै प्राधिकरणमा पदबहाली गर्ने छन्। १८ घण्टासम्मको लोडसेडिङ हटाएर वाहवाही पाएका घिसिङलाई प्राधिकरणमा दोहोर्‍याउन व्यापक जनदबाब भएपनि तात्कालिन प्रधानमन्त्री केपी शर्मा ओलीले निरन्तरता दिएन।

उनको ठाउँमा प्रसारणलाइनका विज्ञ हितेन्द्रदेव शाक्यलाई नियुक्त गरिएको थियो। हितेन्द्रलाई सरकारले जल तथा ऊर्जा आयोगमा पठाएको छ। उनलाई त्यहाँ विशिष्ट श्रेणीमा पठाएको छ।

घिसिङका पालामा प्राधिकरणमा मुख्य तीन वटा काम भएकाले उनको वाहवाही भएको थियो। उनले लोडसेडिङ अन्त्य गरेका थिए। त्यसपछि चुहावट नियन्त्रण गरेका थिए भने घाटामा रहेको प्राधिकरणलाई नाफामा लगेका थिए।