धनगढी, ८ चैत
धनगढी उप–महानगरपालिका स्वास्थ्य शाखाको आयोजनामा आईतबार हत्तिपाईले रोग निवारण अभियान २०७७ नगर स्तरीय योजना तथा बहुनिकाय गोष्ठि सम्पन्न गरेको छ ।

चैत २० गतेबाट सुरु हुन लागेको हत्तिपाईले रोग अन्तरगत नवौं चरणको निवारण अभियानलाई कसरी सफल बनाउने भन्नेमा गोष्ठिमा छलफल भएको थियो ।

गोष्ठिमा धनगढी उप–महानगरपालिकाका उप–प्रमुख सुशीला मिश्र भट्टले हात्तिपाईले रोग बिरुद्धको औषधी खुवाउने अभियान सफल बनाउनका लागि सरोकारवालहरु संग छलफल गरिएको बताईन । अभियानका बारेमा ब्यापक प्रचारप्रशार गरेर सबैले अभियानका बारेमा जानकारी पाउने वातावरण बनाउनुपर्छ उप–प्रमुख भट्टले भनिन्, ‘राष्ट्रिय अभियान भएकाले सबैले सहयोग गर्नुपर्छ ।’

‘हात्तिपाईले रोग बिरुद्धको अभियानमा धेरै ब्यक्तिहरु औषधी खानबाट छुटेको भन्ने कुरा बाहिर आईरहेको हुन्छ उप–प्रमुख भट्टले भनिन्, ‘यस पटक कसैले पनि औषधी खानबाट छुट्नु हुदैन ।’ धनगढी उप–महानगरपालिका वडा नं १२ का वडा अध्यक्ष गणेश प्रसाद जोशीले वडातहमा यस अभियानका बिषयमा ब्यापक प्रचारप्रशार गर्नका लागि महिला स्वास्थ्य स्वयंसेविका परिचालन गरिने बताए । उनले भने, ‘ सबैले जिम्मेवार भएर लागेमा अभियान सफल हुन्छ । धनगढी उप–महानगरपालिकाका निमित्त प्रमुख प्रशासकिय अधिकृत नरेन्द्रबहादुर खातीले जानेबुझेका ब्यक्तिहरुले नै हात्तिपाईलेको औषधी नखाने गरेका कारण यसले गलत सन्देश प्रवाह हुने गरेको बताए । कार्यक्रममा धनगढी उप–महानगरपालिका स्वास्थ्य शाखाका अधिकृत योगेश अवस्थी र लक्ष्मीराज उपाध्यायले सहजीकरण गरेका थिए ।