धनगढी,माघ ११/दार्चुला–तिंकर भञ्जाङको सडकखन्ड निर्माण तालिका केही पर धकेलिएको छ । आर्थिक वर्ष ०७७र०७८ मा निर्माण सुरु गर्ने भनिएता पनि परामर्शदाताको छनोट समयमा नै हुन नसक्दा काम पर सरेको हो ।

महाकाली करिडोरको बृहत् योजनाको एउटा पाटो दार्चुला–तिंकर सडकखण्ड ८७ किलोमिटर लामो छ । २४ वैशाख ०७७ मा मन्त्रिपरिषद्को बैठकले नेपाली सेनालाई सो सडकखण्ड बनाउने जिम्मा दिएको थियो ।

सडकखण्ड निर्माणका लागि पहिला डीपीआर गर्नुपर्ने र डीपीआरका लागि परामर्शदाता छनोट गर्नुपर्ने हुन्छ । परामर्शदाता छनोट गर्दा अनुमानभन्दा बढी लागत लागेपछि कार्यक्रम रद्द भएको नेपाली सेनाका प्रवक्ता सन्तोषबल्लभ पौडेलले जानकारी दिए । उनले १४ पुसमा फेरि बोलपत्र आह्वान गरेको र बोलपत्र आएपछि मात्र परामर्श दाता छनोट भई डीपीआर बन्ने हुँदा काम केही ढिलो हुने बताए ।

अहिले भने सेनाले सडकखण्ड निर्माणको लागि स्थान छनोट गरी दुुई ठाउँमा क्याप बनाउँदै छ । सेनाले दार्चुलाको सुन्सेरामा पहिलो क्याप राख्नेछ । यस्तै, त्यहाँबाट चार किलोमिटरको दूरीमा कोठेधार भन्ने ठाउँ छ, जुन ८७ किलोमिटरको सुरुवाती प्वाइन्ट हो । कोठेधारको १८ किलोमिटर पर दुम्लिङ भन्ने ठाउँ छ, त्यहाँ अर्को क्याम्प बन्दै छ ।

पाँच करोड ५० लाख रुपैयाँ बजेट रहेको उक्त सडकखण्डका लागि सेनाले ट्रयाक मात्र खन्ने र सडकको निर्माण ०७८र७९ मा सडक विभागले गर्ने प्रवक्ता पौडेलले बताए । उनले भने, “बाटो बनाउन विस्फोट गराउनुपर्ने भएकाले नै सो सडकखण्डको निर्माण सेनालाई दिएको हुुनुपर्छ ।”

मोटर बाटो नभएको तिंकरजस्तो दुर्मम क्षेत्रलाई जोड्न सो सडकखण्डको निर्माण महत्वपूर्ण छ । सो सडकखण्डले सीमा विवादमा परेका दार्चुलाका माथिल्ला भूभाग कालापानी, लिपुलेक र लिम्पियाधुरालाई भने समेट्दैन । भारतले गत वर्ष नयाँ नक्सा जारी गर्दै लिपुलेक, कालापनी र लिम्पियाधुरा आफ्नो भूभागमा देखाएको थियो । लिपुलेकमा सडक निर्माणसमेत गरेको थियो । त्यसैको जवाफमा नेपालले पश्चिमी सीमा दार्चुला–तिंकर सडकखन्ड निर्माण यही आर्थिक वर्षबाट सुरु गरेको हो ।

सेनाले कालापानी पुुग्न ४५० मिटर गोरेटो बाटो भने निर्माण गरिसकेको छ । ०६५ मै दार्चुला समदरमुकाम खंलगादेखि एक दशकभित्र तिंकर नाकासम्म सडक पुुर्‍याउने लक्ष्य लिइएकोमा जम्मा ४० किलोमिटर मात्रै ट्रयाक खोलिएको छ ।