धनगढी, पुष ११/ अर्को समुहमा गएर मन्त्री बनेपछि मतदाता तथा पार्टी कार्यकर्ताले मन्त्री गौरीशंकर चौधरीको पुत्ला दहन गरेका छन् । श्रम, रोजगार तथा सामाजिक सुरक्षा मन्त्री गौरीशंकर चौधरीले सपथ ग्रहण गरेको २४ घण्टा बित्न नपाउँदै कैलाली निर्वाचन क्षेत्र नं ३ स्थित उनकै घर रहेको कैलारी गाउँपालिकाका हसुलियामा समर्थकहरुले शनिबार दिउँसो पुतला दहन गरेका हुन्।

संसद विघटन गर्न पाइन्दैन, गौरीशंकर मुर्दावादलगायत नाराबाजी गर्दै पुतला दहन गरेका उनीहरुले आफुहरुलाई धोका दिएको बताएका छन् । ‘उनले हामीलाई धोका दिए ’ नेकपा कैलाली जिल्ला सचिवालय सदस्य पर्सु चौधरीले भने ‘हामीले बिरोधमा पुत्ला दहन गरेका हौँ ।’

केही दिनअघि मन्त्री चौधरीले पार्टी कार्यकर्तालाई सम्बोधन गर्दै आफु प्रतिनिधि सभा विघटनको विरोधमा रहेको र प्रचण्ड–नेपाल समूहमै रहेको भन्दै प्रधानमन्त्री केपी शर्मा ओलीको कडा आलोचनामा उत्रिएका थिए। तर, शुक्रवार प्रधानमन्त्री केपी शर्मा ओलीद्वारा विस्तारित मन्त्रीपरिषदमा उनले श्रम मन्त्रीको जिम्मेवारी लिए ।

मन्त्रीको सपथ लिएपछि उनको नैतिक र चरित्रमाथि कडा आलोचनामा उत्रिएका कार्यकर्ताहरुले पुतला दहन गरेका हुन्। मन्त्री चौधरीको नेकपा ओली समूहमा प्रवेशले आक्रोशित भएका कैलारी गाउँपालिका अध्यक्ष लाजुुराम चौधरीले पदको मोहमा नेता र कार्यकर्तामाथि विश्वासघात गरेको आरोप लगाए।