धनगढी, १० जेठ  – कोरोनाले जनजीवन त्रसित बनेका बेला सुदूरपश्चिम प्रदेश सरकारले आम नागरिकलाई अभिभावकत्व दिन नसकेको सुदूरपश्चिम प्रदेश नेपाली कांग्रेस प्रतिपक्ष दलका नेता डा. रणबहादुर रावलले बताएका छन् ।

शनिबार बिहान मुख्यमन्त्री तथा मन्त्रिपरिषद्को कार्यालयमा मुख्यमन्त्रीसँगको दबाबमूलक छलफलमा डा. रावलले सुदूरपश्चिमका सीमासँग जोडिएका दार्चुला, बैतडी, डडेल्धुरा, कञ्चनपुर र कैलालीमा ४० देखि ५० हजार नागरिक अट्ने खालका क्वारेन्टिनहरु बनाउनु पर्ने बताउँदै भने,‘अहिले जसरी सरकारले भारतबाट आएका नागरिकलाई सीमामै रोकेर चेकजाँच नै नगरी सिधै स्थानीय तहमा पठाउँदै छ, त्यसले अर्काे विकराल रुप लिन सक्छ, त्यसैले प्रदेश सरकारले बेलैमा सीमा क्षेत्रका सबै जिल्लामा प्रवासी नेपालीहरुलाई लक्षित गर्दै विश्व स्वास्थ्य संगठनको मापदण्ड अनुसारको क्वारेन्टिन बनाएर बसाउनु पर्छ ।’ उनले पहिलो चरणमा सीमामा आएका नेपालीहरुलाई सीमाकै क्वारेन्टिनमा राख्ने र त्यसपछि निश्चित समयपछि उनीहरुलाई सम्बन्धित स्थानीय तहको क्वारेन्टिनमा राखेर घर पठाउने प्रवन्ध मिलाउन समेत प्रदेश सरकारले भूमिका खेल्नुपर्नेमा मुख्यमन्त्री त्रिलोचन भट्टलाई जोड दिए ।

यस्तै उनले अहिल्यै सबैलाई खाद्यान्न बाँड्नु भन्दा प्रदेश सरकारले खाद्यान्न संचित गरेर राख्नुपर्ने दूरदर्शी धारणा राखे । ‘हामीले अहिल्यै खाद्यान्न बाँड्ने हैन,’ उनले भने,‘आजको भन्दा भोलि झन भयावह स्थिति आउन सक्छ, त्यसैले खाद्यान्न संचित गरेर राख्नुपर्छ ।’ उनले अहिले गहुँको सिजन भएकाले प्रदेश सरकारले व्यापारीसँग भारत निर्यात गरिने खाद्यान्नलाई रोकेर प्रदेशमै खरिद गरी संचित गर्नुपर्ने धारणा राखे । ‘हामीले अहिले खाद्यान्न संचित गरेर राख्यौँ भने भोलि आउने भोकमरीलाई प्रदेशले सहजै टार्न सक्छ,’ उनले भने,‘यसतर्फ पनि प्रदेश सरकारले बेलैमा सोच्नुपर्ने बेला आएको छ ।’ कोरोनाले संत्रास बढेका बेला कांग्रेस संसदीय दल प्रदेश र संघीय सरकारको साथमा रहेको उनले बताए । उनले भने,‘अहिले हामी प्रदेश र संघीय सरकारको साथमा छौँ, तर सरकारले पनि राम्रो काम गर्नु परो ।’ राजनीति भन्दा माथि उठेर काम गर्नुपर्ने बेला आएको बताउँदै उनले भने,‘अहिलेसम्म राहत वितरणदेखि सबै ठाउँमा राजनीति देखिएको छ, त्यो भन्दा माथि उठेर प्रदेश र संघीय सरकार अगाडि आउनु पर्छ ।’ आगामी आर्थिक वर्षका लागि नयाँ बजेट बनाउँदा सरकारले कोरोनाका कारण विस्थापित भएका प्रवासी नेपालीलाई लक्षित गर्दै नयाँ कार्यक्रम ल्याउनुपर्ने पनि उनले बताए ।

‘आगामी नयाँ बजेटमा प्रदेश सरकारले सीप बोकेर फर्केका नेपालीलाई लक्षित गरेर कार्यक्रमहरु ल्याउनुपर्छ,’ उनले भने,‘ता कि जसले गर्दा विस्थापित प्रवासी नेपालीलाई आफ्नै गाउँठाउँमा केही गर्न प्रेरित गरोस् ।’ मुख्यमन्त्री भट्टले सुदूरपश्चिम प्रदेश सरकारले अन्य प्रदेशको भन्दा राम्रो काम गरेको दाबी गरे । उनले भने,‘हामीले अन्य प्रदेशको भन्दा राम्रो काम गरेका छौँ, यहाँ सत्ता पक्ष र प्रतिपक्षका साथीहरुले विरोधका लागि विरोध नगरिदिनुस् ।’