धनगढी, २ पुष । आगामी निर्वाचनमा महिलाहरुको समान सहभागिता तथा निष्पक्ष निर्वाचन बारे धनगढीमा शुक्रबार अभिमुखीकरण कार्यक्रम सम्पन्न भएको छ । कुर्वे उष्ट्रोको आर्थिक सहयोग र मानव अधिकारको लागि महिला, एकल महिला समूह सुदूरपश्चिम प्रदेशको आयोजनामा भएको कार्यक्रममा महिलालाई आगामी निर्वाचनमा समान सहभागिता कसरी गर्न सकिन्छ भन्ने विषयमा वृहत छलफल भएको छ ।

कार्यक्रममा बोल्दै प्रमुख अतिथि तथा सुदूरपश्चिम प्रदेश सभा सदस्य डिल्लीराज पन्तले संविधानले महिलालाई ३३ प्रतिशत सहभागिता छुट्याए पनि अझै समाजमा रहेको कूरीति कुसंस्कारका कारण उनीहरु खुलेर आउन नसकेको बताए । उनले भने,‘राजनीतिमा त झन महिलाहरु आउनै सकेका छैनन्, महिलाको सहभागिता बढाउन यसमा हामीले आ–आफ्नो ठाउँबाट लाग्नुपर्छ ।’ आफूले आगामी दिनमा पनि यस्ता कार्यक्रमलाई सहयोग गर्ने बताउँदै भने,‘महिलालाई सबैभन्दा पहिला आर्थिक उपार्जनका गतिविधिमा नलगाउन्जेलसम्म उनीहरुको हरेक क्षेत्रमा समान सहभागिता हुनै सक्दैन, तसर्थ हामीले यस्ता जनचेतनामूलक तथा अभिमुखीकरण कार्यक्रम गर्न सकेमा मात्रै सार्थकता दिलाउन सकिन्छ ।’

मानव अधिकारको लागि महिला, एकल महिला समूह सुदूरपश्चिम प्रदेशका प्रदेश अध्यक्ष सुमन शर्माको अध्यक्षतामा सम्पन्न कार्यक्रमको संचालन बेद अवस्थीले गरेकी थिइन् भने कार्यक्रममा धनगढी उपमहानगरपालिका कार्यपालिका सदस्य गीता पन्त, धनगढी वडा नम्बर ५ का वडाअध्यक्ष हीरासिंह पातलीलगायतको सहभागिता रहेको थियो ।