धनगढी, २५ मंसिर । नेपाली कांग्रेसको १४ औँ महाधिवेशनमा केन्द्रीय सदस्य तथा पूर्वमन्त्री एनपी साउदलाई महामन्त्री बनाउन माग गर्दै बालुवाटारमा धर्ना सुरु भएको छ । देशभरका करिब तीन सय महाधिवेशन प्रतिनिधिहरू, विभिन्न जिल्लाका सभापति तथा पदाधिकारीहरुले शनिबार बिहानदेखि सभापति शेरबहादुर देउवाको प्यानलबाट महामन्त्रीको उम्मेदवार साउदलाई बनाउन माग गर्दै धर्ना दिएका हुन् ।
नेपाल विद्यार्थी संघको सभापति र दुई–दुई पटक केन्द्रीय सदस्य भइसकेका व्यक्तिलाई महामन्त्री बनाउन रोक्न नमिल्ने उनीहरुको माग रहेको छ । धर्नामा सहभागी नेपाली कांग्रेस कञ्चनपुरका जिल्ला सचिव हेमराज ओझाले भने, ‘०५९ सालदेखि पार्टीको केन्द्रीय सदस्य रहेका साउद सुदूरपश्चिममा सभापति देउवापछिको निर्विकल्प र सर्वस्वीकार्य नेता भएकाले महामन्त्रीको उम्मेदवार बनाउनु पर्छ ।’
सुदूरपश्चिममा पदाधिकारी नहुँदा भविष्यमा कांग्रेसको संगठनमा धक्का लाग्ने पनि महाअधिवेसन प्रतिनिधिसमेत रहेका सचिव ओझाले बताए । उनले थपे, ‘सानै उमेरदेखि विद्यार्थी राजनीतिमा लागेका साउद महामन्त्रीका निर्विकल्प उम्मेदवार हुन् ।’
वर्तमान सभापति देउवाको नेतृत्वमा कांग्रेस विभाजित भएर बनेको कांग्रेस (प्रजातान्त्रिक)मा उनी केन्द्रीय सदस्य भएका थिए । कांग्रेस प्रजातन्त्रिकको ११ औँ महाधिवेशनमा केन्द्रीय सदस्य बनेका साउद ०६४ मा कांग्रेस र कांग्रेस प्रजातन्त्रिकबीच एकता हुँदा केन्द्रीय सदस्यकै रुपमा रहेका थिए । एकीकरणपछिको १२ औँ र १३ औँ महाधिवेशनमा साउद केन्द्रीय सदस्य विजयी भएका थिए । उनी अहिले महामन्त्रीमा दाबी गरिरहेका छन् ।
कांग्रेसको शुभेच्छुक संस्था समन्वय विभाग प्रमुखसमेत रहेका उनी ०४१ सालमा बलबहादुर केसीको नेतृत्वमा केन्द्रीय सदस्य बनेका थिए भने ०४८ सालमा नेaविसंघको केन्द्रीय अध्यक्ष भएका थिए ।
सभापति देउवाको प्यानलमा सरकारका प्रवक्ता तथा सञ्चारमन्त्री ज्ञानेन्द्रबहादुर कार्की, गृहमन्त्री बालकृष्ण खाँण, सहमहामन्त्री प्रकाशशरण महतलगायतका नेताहरू पनि महामन्त्रीका दाबेदार हुन् ।
