धनगढी,२८ असोज । हिन्दु धर्मावलम्बीहरुको महान पर्व दशैँ सुरु भएसँगै सवारी साधनहरु दुर्घटना हुने क्रम बढेका छन् । विगत केही दिन यता सडक दुर्घटनाकै कारण धेरैले ज्यान गुमाईसकेका छन ।

सोमबार कास्कीको घान्द्रुकमा भएको दुर्घटनामा ८ जनाले र अछाममा भएको दुर्घटनामा ४ जनाले ज्यान गुमाएका थिए । यस्तै मंगलबार मुगुमा भएको दुर्घटनामा झन ३२ जनाको ज्यान गएको थियो । यस्तै बुधबार बैतडीमा पनि सवारी दुर्घटनामा १ जनाले ज्यान गुमाएका छन ।

यती मात्रै हैन मंगलबार डडेल्धुरामा भएको सवारी दुर्घटनामा ४ जना घाईते भए भने बुधबार कैलालीमा भएको दुर्घटनामा ५ जना घाईते भए । चाडपर्वका समयमा प्रायजसो सडक दुर्घटनाका घटना बढ्ने गरेका छन ।

पछिल्लो केहि दिन यता मात्रै दैनिक जसो सवारी दुर्घटना भएका छन । चाडपर्वको समयमा यात्रुको आवतजावत धेरै हुने भएकाले पनि सवारी दुर्घटनाका घटनामा बृद्धि हुने गरेको सुदूरपश्चिम प्रदेश ट्राफिक प्रहरी कार्यालय अत्तरियाका प्रमुख प्रहरी उपरिक्षक बामदेव गौतमले बताए ।

उनले चाडपर्वका समयमा यात्रुहरुको आवतजावत बढी हुने र सवारी साधनको अवस्था राम्रो नहुँदा दुर्घटना भईरहेको बताए ।
यसैगरी उनले चाडपर्वमा मदिरा सेवनले पनि दुर्घटनालाई निम्त्याउने बताए । ‘हामी चाडपर्वको बेला मदिरा सेवन गरी सवारी चलाउछौ’ उनले भने ‘मदिरा सेवन गरेको अवस्थामा गाडीको स्पिड कति छ भन्ने पनि ख्याल नराखी कुदाउदा दुर्घटना हुन्छ ।’

यसको नियन्त्रणका लागी ट्राफिक कार्यालयले पहाडी जिल्लाका विभिन्न ठाउँमा कडाईका साथ चेकजाँच गरीरहेको उनले बताए । ‘हामीले मदिरा सेवन गरी सवारी चलाउनेलाई कडाईका साथ चेकजाँच गरी कारबाही गर्ने गरेका छौ’ उनले भने ‘यात्रु बोक्ने सवारी साधनहरुलाई पनि कडाईका साथ चेकजाँच गरेकाले होला सुदूरपश्चिममा त्यस्तो भयानक घट्ना घट्न पाएको छैन ।’

उनले सवारी साधनहरुलाई यात्रु भन्दा बढी सवारी बोके कारबाही गर्ने गरेको पनि उनले बताए । पहाडी क्षेत्रका विभिन्न जिल्लामा जाने सवारी साधनहरुलाई विशेष गरी निगरानीमा राखी चेकजाँचको दायरा बढाईएको उनको भनाई छ ।