धनगढी : खडेरीका कारण दार्चुलामा पनि यो बर्ष हिउँदेबालीको उत्पादनमा कमी आउने भएको छ। लामो समयदेखि पानी नपर्दा हिउँदे बालीको उत्पादनमा ह्रास आउने अनुमान गरिएको कृषि ज्ञान केन्द्र दार्चुलाका कार्यालय प्रमुख प्रकाश कुमार पन्तले जानकारी दिए।

कार्यालय प्रमुख पन्तका अनुसार यो बर्ष गहुँ उत्पादनमा निकै गिरावट आउने उनले बताए। दार्चुलामा ५ हजार ९ सय ६५ हेक्टर जमीनमा गहुँ खेती गरिँदै आएको भएपनि ३२ दशमलब ७ प्रतिशत जमिनमा मात्रै मात्रै सिंचाईको सुविधा रहेको छ।

सिंचाईको सुविधा नभएका ठाउँमा कतिपय किसानहरुले गहुँबाली छर्नै पाएनन् भने छरेका ठाउँमा पनि खडेरीका कारण बालीनाली सुकेको किसानहरुले बताएका छन्। यो बर्ष हिउँदमा बर्षा नहुँदा सिंचाई सुविधा नभएका ठाउँमा गहुँबाली सुकिसकेको किसानहरुले बताएका छन्।

खडेरीका कारण उत्पादनमा २० देखि २५ प्रतिशत कमी आउने आँकलन गरिएको कृषि ज्ञान केन्द्रले जनाएको छ। गत वर्ष दार्चुलामा १४ हजार १ सय ३ मेक्ट्रिक टन गहु उत्पादन भएको समेत कृषि ज्ञानकेन्द्र दार्चुलाले जनाएको छ। उत्पादनमा ह्रास आउने संकेत देखिएसंगै जिल्ला बाहिरबाट खाद्यान्न आयात वृद्धि हुनेछ।

खडेरीका कारण बालीनाली सुकेपछि बाहिरबाट आयात गर्नुपर्ने खाद्यान्न परिमाण वृद्धि हुने कृषि ज्ञान केन्द्रका प्रमुख पन्तले बताएका छन। पछिल्लो समय दार्चुला जिल्लामा हिउँदे बाली उत्पादनमा गिरावट आउने गरेको समेत कृषि ज्ञानकेन्द्र दार्चुलाले जनाएको छ।