अत्तरिया, २३ पौष/ सानो छदा घरमा महिनावारी भएका किशोरी तथा महिलाहरुलाई छुन हुँदैन भन्ने धारणा बोकेकी गोदावरी नगरपालिका वनबेहडाकी १५ वर्षिय महेश्वरी जोशी हाल महिनावारीको बेला भेदभाव गर्न नहुने चेतना फैलाउन थालेकी छन् । शैलेश्वरी मावि बेहडामा कक्षा १० मा पढ्ने जोशी बाल अधिकार, लैङ्गिक हिँसा र सक्षम छोरीको विषयमा जानकार पनि छन् ।

महेश्वरी जस्तै उनका साथीहरु राधा नेपाली र रन्जना विक ले पनि “सुरक्षित सिकाई कार्यक्रम” मा भाग लिएपछि आफ्नो आत्मविश्वास बढेको र आफुले सिकेका कुराहरु साथीहरु र घर परिवारका सदस्यहरुलाई भन्ने गरेका छन् । विहिवार विद्यालयमा गोदावरी नगरपालिकाको अनुमगन टोलीसँगको अन्तरक्रियामा उनीहरुले आफ्नो धारणा राखेका हुन् ।

उक्त विद्यालयका किशोरीहरुले २ दिने सक्षम छोरी तालिम पाएका थिए । साथै विद्यालयका कक्षा ६ देखि कक्षा १० सम्मका विद्यार्थीहरु स्टुडेन्ट लाईफ क्लबमा आबद भई रेडियो मार्फत सञ्चालन हुने आशाका किरणहरु कार्यक्रम मार्फत सिकाई अभिवृद्घि गरिरहेका छन् ।

युकेएड को आर्थिक सहयोग र मर्सिकोर नेपाल मार्फत बेस संस्थाद्वारा लागु गरिएको सुरक्षित सिकाई कार्यक्रमले गरेका क्रियाकलापहरु र प्रगतिको नगरपालिको अनुगमन टोलीले विहिवार अनुगमन गरेको हो । कार्यक्रममा विद्यालयका प्रधान अध्यापक नवराज भट्टले विद्यालयमा सुरक्षित सिकाईको वातावरण निर्माण गर्नमा सहयोग पुगेको बताए ।

अनुगमन टोलीका प्रमुख तथा गोदावरी नगर पालिका उप प्रमुख रत्न खडायतले कार्यक्रमले राम्रो उपलब्धी हासिल गरेको बताए। नगर पालिका कार्यालयमा आयोजना गरिएको समिक्षा बैठकमा विद्यालय अनुगमनको बेला देखेको उपलब्धीहरुलाई हेर्दा सुरक्षित सिकाई कार्यक्रमको उपलब्धीहरु अन्य विद्यालयमा पनि लागु गर्नु उपयुक्त हुने धारणा राखे।

कार्यक्रममा नगरपालिकाका शिक्षा शाखा प्रमुख बसन्त खत्रीले विद्यालयमा आवश्यक यस्ता कार्यक्रम लाभादायि भएकोले विद्यालयहरुले यसबाट पुर्ण फाईदा लिन सक्नुपर्ने र नगर पालिका त्यसका लागि समन्वय गर्न सँधै तत्पर रहेको बताए । कार्यक्रममा नगरपालिकाको महिला तथा बालबालिका शाखा, स्वास्थ्य शाखा, योजना शाखा र सामाजिक विकास शाखाका प्रतिनीधिहरुको पनि सहभागिता थियो ।

कार्यक्रममा मर्सिकोर नेपाल धनगढीका अनुगमन तथा मुल्याँकन संयोजक गणेशराज भट्टले कार्यक्रमको लक्ष्य, उद्देश्य र कार्यपद्घतिबारे जानकारी गराउनुभएको थियो भने बेसका जिल्ला अधिकृत मिना बि.क. ले गोदावरी नगरपालिकाभित्र परियोजनाले गरेका क्रियाकलापहरुबारे बताएकी थिइन्।