काठमाडौं, २१ असोज/प्रमुख प्रतिपक्षी दल नेपाली कांग्रेसले अनसनरत डाक्टर गोविन्द केसीका जायज मागलाई सम्बोधन गर्न ढिलाइ गरे सरकारले गम्भीर परिणाम भोग्नु पर्ने चेतावनी दिएको छ।

कांग्रेस प्रवक्ता विश्वप्रकाश शर्माले बुधबार विज्ञप्ति प्रकाशित गरी डा. केसीको स्वास्थ्य स्थिति जटिल बन्दा पनि सरकारले वार्ताको वातावरण सृजना गर्न सचेत गराएका छन्।

‘वार्ता नगर्ने बालुवाटारे बालहठ यहाँलाई महंगो पर्नेछ प्रधानमन्त्रीज्यू’ विज्ञप्तिमा भनिएको छ,‘हेक्का रहोस् लोकतन्त्र भर्सेस ‘कम्युनिष्टतन्त्र’ मा अन्ततः जित लोकतन्त्रकै हुनेछ।’

‘डा। केसीको जायज आवाजलाई सम्बोधन गर्न ढिलाइ गर्ने गम्भीर भुल किमार्थ नगरियोस्’ विज्ञप्तिमा अगाडी भनिएको छ।

सत्याग्रहीलाई दुव्र्यवहार देखि, सत्ताको अहंकार सम्मले कम्युनिष्ट तन्त्रको मनोविज्ञानलाई मात्रै पुष्टि गरेको कांग्रेसले जनाएको छ।

‘कुनै बेला कमरेड प्रचण्डहरुको बन्दुकको विद्रोहलाई कटु आलोचना गर्नु हुन्थ्यो त्यो स्वभाविक थियो, अब अनशन जस्तो शान्तिपूर्ण सत्याग्रहलाई समेत सुन्न अस्वीकार्य गर्दै हुनुहुन्छ’ प्रधानमन्त्रीलाई प्रश्न गरिएको छ,‘खुल्ला ढंगले के यो सन्देश दिन चाहनु भएको हो कि–लोकतान्त्रिक प्रक्रियाबाट निर्वाचित हुनु र लोकतान्त्रिक चरीत्रको हुनुमा फरक हुन्छ ?’

नेपाली कांग्रेसको पालामा डा. केसी अनसन बस्दा वार्ता गरेर कयौं माग पूरा गरिएको औंल्याउँदै विज्ञप्तिमा उसबेला पूरा गरिएका माग प्रधामन्त्रीले उल्ट्याएको आरोप लगाइएको छ।

एकातर्फ पहिले पुरा गरेका माग उल्टाइएको भन्दै कांग्रेसले अर्कातर्फ नयाँ सन्दर्भमा अघि सारिएका मागबारे संवादमार्फत समाधान खोज्ने लोकतान्त्रिक संस्कार प्रधामन्त्रीमा नभएको जनाएको छ।