धनगढी, २ भदौ/ कञ्चनपुरमा बँदेलको आक्रमणबाट चार जना घाइते भएका छन् । बेदकोट नगरपालिका–१० पथरीयामा जंगली बँदेलको आक्रमणबाट चार जना घाइते भएका हुन् ।

शुक्लाफाँटा राष्ट्रिय निकुञ्जबाट आएको बँदेलको आक्रमणबाट कञ्चनपुरको बेदकोट नगरपालिका–१० का ५० वर्षीय भोजबहादुर सार्की, १८ वर्षीय गुलसन सुनार, ४५ वर्षीय चैते सुनार र ४८ वर्षीय उदय रावल घाइते भएको ईलाका प्रहरी कार्यालय झलारीका ईन्सपेक्टर धर्मेन्द्र रावलले बताए । घाइतेहरुको महेन्द्रनगरस्थित महाकाली अस्पतालमा उपचार भइरहेको छ ।

पहिले पनि उक्त बँदेलले आक्रमण गरेर स्थानीयहरुलाई त्रसित बनाएको थियो । आज पनि आएर खेतमा काम गरिरहेका र सडकमा हिँडिरहेका लाई पनि आक्रमण गरेको स्थानीय बिर्खे सुनारले बताए ।

जिल्ला प्रहरी कार्यालयका प्रवक्ता अमबहादुर थापाले पछि पनि उक्त बँदेलबाट खतरा हुन सक्ने भन्दै जिल्ला प्रहरीको टोलीले उक्त बँदेललाई गोली हानेर मारेको बताए । बँदेललाई प्रहरीले शुक्लाफाँटा निकुञ्ज प्रशासनको जिम्मा लगाएको छ ।