धनगढी, २६ असोज / सेती-महाकाली ट्रक यातायात व्यवसायी सङ्घको धनगढीस्थित प्रधान कार्यालयमा व्यवसायीहरूले तालाबन्दी गरेका छन्। विभिन्न माग सम्बोधन गर्न छलफलका लागि आग्रह गरिए पनि अध्यक्ष मोहनसिंह साउदले आफैँले बोलाएको बैठक निष्कर्षविहीन छाडेर गएपछि व्यवसायीहरू तालाबन्दी गर्न बाध्य भएको बताएका छन्।
ट्रक यातायात व्यवसायी ज्ञानु तामाङका अनुसार अध्यक्ष साउदले एकलौटी ढङ्गले संघ सञ्चालन गर्न खोजेको र आम व्यवसायीका माग सम्बोधन गर्न पहल नगरेको भन्दै तालाबन्दी गरिएको हो। व्यवसायीहरूले संघको नेतृत्वले आफूहरूको हितमा काम नगरेको आरोपसमेत लगाएका छन्।
सङ्घको आधा कार्यसमितिसहित सयौँ ट्रक यातायात व्यवसायीले विशेष साधारणसभा बोलाउन माग गरिरहेका छन्। व्यवसायीहरूले आफ्ना माग सुनुवाइ नभएको भन्दै असन्तुष्टि जनाउँदै आएका छन्।
यसैबीच, अनुमति मागेको भन्दै व्यवसायीका ट्रकहरू मनोमानी ढङ्गले चेकजाँच गरिएको आरोप पनि अध्यक्ष साउदसहितको समूहलाई लागेको छ। व्यवसायीहरूले ट्रक चेकजाँचको अधिकार र त्यसको प्रक्रियामाथि प्रश्न उठाउँदै आएका छन्।
यता, सङ्घका अध्यक्ष मोहनसिंह साउदले भने आफूले कानुनबमोजिम नै काम गरिरहेको दाबी गरेका छन्। व्यवसायीहरूले आफूमाथि लगाएका आरोप निराधार रहेको उनको भनाइ छ। क्षमताभन्दा बढी भार बोकेका ट्रक चेकजाँच गर्न आफूहरूले अनुमति मागेको उनले पटकपटक दाबी गर्दै आएका छन्।
तर, राजमार्ग सुरक्षा तथा ट्राफिक व्यवस्थापन कार्यालय अत्तरियाका प्रमुख प्रहरी उपरीक्षक नवराज कार्कीले भने कुनै व्यक्ति वा संस्थाले आफैँ कानुन हातमा लिएर सवारीसाधन चेकजाँच गर्न नपाउने स्पष्ट पारेका छन्।
कानुनविपरीत कुनै गतिविधि भइरहेको भए सम्बन्धित निकायलाई सूचना दिन सकिने भए पनि आफैँले सवारीसाधन रोकेर चेकजाँच गर्ने अधिकार कसैलाई नभएको उनले बताएका छन्।
सङ्घभित्रको विवाद, विशेष साधारणसभाको माग र ट्रक चेकजाँचको विषयले व्यवसायी तथा नेतृत्वबीचको असन्तुष्टि सतहमा आएको छ।
