सुर्खेत 

असार १०

जुम्ला कर्णाली स्वास्थ्य विज्ञान प्रतिष्ठनाका ४ जना स्वास्थ्यकर्मीमा कोरोना पोजेटिभ देखिएको छ । यो सँगै कर्णालीमा कोरोना संक्रमित स्वास्थ्यकर्मी ९ जना पुगेका छन् । केहि दिन अघि कर्णाली प्रदेश अस्पतालका ५ जना स्वास्थ्यकर्मीमा कोरोना पोजेटिभ देखिएको थियो । यी सबै स्वास्थ्यकर्मीहरु समुदायबाट आएका विरामीहरुबाट कोरोना भएका हुन् ।

विज्ञान प्रतिष्ठान शिक्षण अस्पताल ओपिडि डिउटिमा खटिएका ४ जनालाई कोरोना पोजेटिभ देखिएको अस्पतालका निर्देशक डाक्टर मंगल रावलले जानकारी दिए । उनका अनुसार ति सबै स्वास्थ्यकर्मीहरुलाई डिउटिमा काम गरिरहेको बेला नै उनिहरुलाई समुदाय स्तरबाट आएका विरामीहरुबाट कोरोना सरेको हुन सक्ने उनले बताए । तर कुन विरामी संक्रमित थिए भन्ने अहिले सम्म पत्ता नलागेको उनले बताए ।
‘डिउटिमा खटिएका स्वास्थ्यकर्मीहरुलाई फेरबदल गर्दा प्रत्येक चोटि पिसिआर जाँच गरेर मात्रै फेरबदल गर्ने गरिएको हुनाले यो पटक ओपिडि डिउटिमा रहेका स्वास्थ्यकर्मीहरुको पिसिआर चेक गराउदा कोरोना पोजेटिभ देखिएको,’ ‘कर्णाली स्वास्थ्य विज्ञान प्रतिष्ठानका निर्देशक डाक्टर मंगल रावलले भने,’ ‘कोरोना पोजेटिभ देखिएका सबै स्वास्थ्यकर्मीहरु ओपिडिमा मात्रै काम गरिहेका थिए, उनिहरुको अबस्था अहिले सामान्य रहेको छ,।’

४ जना स्वास्थ्यकर्मीमा कोरोना पोजेटिभ देखिए सँगै अहिले कर्णाली स्वास्थ्य विज्ञान प्रतिष्ठानको आकस्मिक सेवा बाहेक अरु सबै सेवा बन्द गरिएको छ । डिउटिमा रहेका स्वास्थ्यकर्मीमा कोरोना पोजेटिभ देखिएको हुनाले अब कर्णालीमा समुदाय स्तर सम्म कोरोना फैलिएको बलियो प्रमाण भएको निर्देशक डाक्टर रावलले बताए ।

प्रतिष्ठानमा कार्यरत सबै स्वास्थ्यकर्मीहरुको पिसिआर चेक गराउन लागिएको पनि उनले जानकारी दिए । सबै को रिर्पोट आइसकेपछि मात्र अस्पतालका अरु सेवाहरु परिस्थीति हेरेर खोल्ने डाक्टर रावलले बताएका छन् ।

पछिल्लो समयमा सरकारले लकडाउनमा केही खुकुलो गरेपछि जुम्ला स्वास्थ्य विज्ञान प्रतिष्ठानमा उपचार गराउनेहरुको भिडभाड अत्याधिक बढेको थियो । स्थानीय प्रशासनले सामाजिक दुरीलाई कायम गर्ने भने पनि भिडभाडका कारण सामाजिक दुरी कायम हुन सकिरहेको थिएन ।
यस अघि जुम्लाका कोरोना संक्रमित मध्य २५ जना फिर्ता भएका र ३ जना अहिले पनि आईसुलेसनमा उपचार गराइरहेका प्रतिष्ठानले जनाएको छ ।