धनगढी, ११ साउन/कैलालीको धनगढी उपमहानगरपालिका–४, न्युरोड टोलकी करिब २४ वर्षीया पूजा धानुक (धामी) को शंकास्पद मृत्यु भएको छ ।

सोमबार साँझ करिब ४ः३० बजे उनको मृत्यु भएको हो । परिवारले भने उनले आत्महत्या गरेको दाबी गरेको छ। तर माइती पक्षले घटनालाई आत्महत्या नभई हत्या भएको आशंका गर्दै घटनाको निष्पक्ष छानबिनको माग गरेका छन् ।

मृतकको करिब ९ महिनाअघि मात्रै विवाह भएको थियो । घटनापछि माइती पक्षले परिवार विरुद्ध किटानी मुद्दा दर्ता गर्ने तयारी गरिरहेको जनाएको छ ।

यता, घटनास्थलको मुचुल्का उठाउन प्रहरी प्रशासनले ढिलाइ गरेको आरोपसमेत लागेको छ । प्रहरीले भने मुचुल्का उठाउने प्रक्रिया पूरा भए पनि हालसम्म शवको पोस्टमार्टम हुन बाँकी रहेको जनाएको छ ।

घटनाको वास्तविक कारण पोस्टमार्टम प्रतिवेदन र प्रहरी अनुसन्धानपछि मात्रै खुल्ने भएकाले प्रहरीले सबै पक्षबाट अनुसन्धान अघि बढाइरहेको जनाएको छ ।