बैतडी, १७ असार  /  बैतडी मेलौलीमा निर्माणाधीन तिनजोर्ना-हरडाखान-कान्तिपुर हुँदै मेलौली नगरपालिका-९ को वडा कार्यालयसम्म पुग्ने सडक स्तरोन्नति कार्य अघि बढाउने सहमतिपछि आमरण अनसन अन्त्य भएको छ ।

सडक डिभिजन कार्यालय पाटन,बैतडीमार्फत ठेक्का भएर निर्माण भइरहेको उक्त सडक निर्माणको काममा अवरोध भएपछि वडा सदस्य जनकराज भट्ट र पूर्व वडा सदस्य भीमदत्त भट्ट सोमबारदेखि नगरपालिकामा आमरण अनसन बसेका थिए । मेलौली नगरपालिका –९ का वडा अध्यक्ष लोकराज भट्टले सडक निर्माणमा अवरोध गरेको भन्दै उनीहरु अनसनमा बसेका थिए ।

अनसनरत पक्षसंग बुधबार मेलौली नगरपालिकामा भएको वार्तापछि सडक निर्माण कार्य अघि बढाउने सहमति भएको हो । नगर प्रमुख भीमबहादुर चन्दको अध्यक्षता र बैतडीका सहायक प्रमुख जिल्ला अधिकारी राजमणी निरौलाको विशेष उपस्थितिमा बसेको बैठकले सडक निर्माणमा सहमति जुटाएको हो ।

सहमति अनुसार सडक निर्माणका क्रममा फेरि कुनै अवरोध सिर्जना भए जिल्ला प्रशासन कार्यालयले आवश्यक सुरक्षा व्यवस्था मिलाई निर्माण कार्यलाई निरन्तरता दिइनेछ । सडक निर्माण कार्यलाई अघि बढाउने प्रतिबद्धता र सहमतिपछि अनसन अन्त्य गरिएको वडा सदस्य जनकराज भट्टले बताए ।