ब्रेक फेल हुँदा बाजुरामा यात्रुवाहक बस दुर्घटना, २६ जना घाइत

बाजुरा, ७ असार । बाजुराको बुढीगंगा नगरपालिका–८ रिठाबजारमा शनिबार बिहान यात्रुवाहक बस दुर्घटना हुँदा २६ जना घाइते भएका छन्।

महेन्द्रनगरबाट बाजुराको मार्तडीतर्फ आउँदै गरेको सु.प.प्र.०१–००१ ख १३५५ नम्बरको बस बिहान करिब ७ः१० बजे एक्कासी ब्रेक फेल भई सडकको बाँया नालीतर्फ पल्टिएर दुर्घटनामा परेको जिल्ला प्रहरी कार्यालय बाजुराले जनाएको छ।

प्रहरीका अनुसार बस खप्तड छेडेदह गाउँपालिका–५ दोगडी निवासी ४३ वर्षीय खडक बुढाले चलाएका थिए। दुर्घटनाको खबर प्राप्त हुनासाथ अस्थायी प्रहरी पोष्ट रिठाबजार, प्रहरी चौकी बार्जुगाड तथा जिल्ला प्रहरी कार्यालय बाजुराबाट प्रहरी टोली घटनास्थलमा खटिएको थियो। घाइतेहरूको उद्धारका लागि बडिमालिका नगरपालिका र जिल्ला अस्पताल बाजुराको एम्बुलेन्स समेत परिचालन गरिएको थियो।

दुर्घटनामा घाइते भएका २३ जनाको जिल्ला अस्पताल बाजुरामा उपचार भइरहेको प्रहरीले जनाएको छ। एक जना घाइतेलाई थप उपचारका लागि अछामस्थित बयालपाटा अस्पताल पठाइएको छ भने दुई जना घाइते मोटरसाइकलमार्फत आफैं उपचारका लागि अस्पताल गएको बुझिएको छ।

घाइतेहरूको विस्तृत परिचय खुल्न बाँकी रहेको र घटनाबारे थप अनुसन्धान भइरहेको जिल्ला प्रहरी कार्यालय बाजुराले जनाएको छ।