धनगढी, २५ चैत/ स्वास्थ्य बिमा बोर्डको स्थापना दिवस सुदूरपश्चिम प्रदेशमा विभिन्न कार्यक्रमका साथ मनाइएको छ । कार्यक्रमको अध्यक्षता स्वास्थ्य बिमा सुदूरपश्चिम प्रदेश निर्देशक जनक साउँदले गरेका थिए भने प्रमुख अतिथिका रूपमा सामाजिक विकास मन्त्रालयका सचिव डाक्टर हेमराज रेग्मीको उपस्थिति रहेको थियो । कार्यक्रममा सामाजिक विकास मन्त्रालयका सचिव डाक्टर हेमराज रेग्मीले स्वास्थ्य बिमा कार्यक्रम अप्ठ्यारो अवस्थामा परेका व्यक्तिहरूका लागि ठूलो सहारा भएको बताए । उनले भने, ‘स्वास्थ्य बिमा कार्यक्रमले आर्थिक अभावका कारण उपचारबाट वञ्चित हुनुपर्ने अवस्थालाई कम गर्न महत्वपूर्ण भूमिका खेलेको छ ।’ उनले यस कार्यक्रमलाई अझ प्रभावकारी बनाउन सेवा विस्तार, जनचेतना अभिवृद्धि तथा व्यवस्थापनमा सुधार आवश्यक रहेको उल्लेख गरे ।

सचिव रेग्मीले विशेष गरी ग्रामीण तथा दुर्गम क्षेत्रमा रहेका नागरिकहरूलाई लक्षित गरेर कार्यक्रम सञ्चालन गर्नुपर्नेमा जोड दिए । उनले स्वास्थ्य बिमा सेवाको गुणस्तर सुधार, सहज पहुँच र पारदर्शितामा ध्यान दिनुपर्ने आवश्यकता औंल्याए । साथै, सबै तहका सरकार तथा सम्बन्धित निकायबीच समन्वय आवश्यक रहेको उनले बताए ।

कार्यक्रममा बोल्दै अध्यक्ष जनक साउँदले स्वास्थ्य बिमा कार्यक्रमलाई जनताको पहुँचसम्म पु¥याउन निरन्तर प्रयास भइरहेको बताए । उनले बिमा कार्यक्रमले आर्थिक रूपमा कमजोर तथा विपन्न वर्गलाई उपचारमा सहजता प्रदान गरिरहेको उल्लेख गरे । साथै उनले स्थानीय तह, सरोकारवाला निकाय तथा नागरिकको सक्रिय सहभागिताले मात्रै कार्यक्रमलाई प्रभावकारी बनाउन सकिने धारणा व्यक्त गरे ।

सूचना अधिकारी दिनेश चौधरीले आफ्नो प्रस्तुतिमा स्वास्थ्य बिमा कार्यक्रमको उद्देश्य, उपलब्धि तथा चुनौतीहरूबारे जानकारी गराएका थिए । उनले बिमा कार्यक्रममार्फत हजारौं नागरिकले स्वास्थ्य सेवामा पहुँच पाएको र यसले स्वास्थ्य क्षेत्रमा सकारात्मक प्रभाव पारेको बताए । तथापि, अझै पनि सबै नागरिकलाई कार्यक्रममा समेट्न चुनौती रहेको उनले स्वीकार गरे । कार्यक्रमको सञ्चालन अमित भट्टले गरेका थिए भने स्वागत मन्तव्य दिपक विष्टले व्यक्त गरेका थिए । सूचना अधिकारी दिनेश चौधरीले स्वास्थ्य बिमा सम्बन्धी प्रस्तुति प्रस्तुत गरेका थिए ।

कार्यक्रममा दर्ता सहयोगी कर्णप्रसाद रेग्मीलाई सम्मान गरिएको थियो । उनलाई सबैभन्दा बढी योगदान रकम संकलन गरेको भन्दै प्रशंसा पत्रसहित सम्मान गरिएको हो । कार्यक्रममा सहभागीहरूले उनको कार्यप्रति उच्च सम्मान व्यक्त गरेका थिए । यसले अन्य दर्ता सहयोगीहरूलाई पनि प्रेरणा मिल्ने विश्वास गरिएको छ ।