धनगढी, २८ पुस  /  कैलालीको चुरे क्षेत्रमा सालको काठ तस्करी तीव्र बन्दै गएको छ। डिभिजन वन कार्यालय कैलालीले एक महिनाको अवधिमै चुरेका विभिन्न स्थानबाट ठूलो परिमाणमा  सालको काठ बरामद गरेको छ।

डिभिजन वन कार्यालयले सार्वजनिक गरेको विवरणअनुसार एक महिनाको अन्तरालमा ५३१ दशमलव ४८ क्युफिट सालको चिरान काठ बरामद गरिएको हो। सोमबार आयोजित पत्रकार सम्मेलनमा वरिष्ठ डिभिजनल वन अधिकृत रामविचारी ठाकुरले चुरे गाउँपालिका क्षेत्रमा रहेका सामुदायिक वनबाट ६ पटक र गौरीगङ्गा नगरपालिका–६ बाट एक पटक गरी सात स्थानबाट काठ बरामद गरिएको जानकारी दिए।

ठाकुरका अनुसार मंसिर २६ गते आफू कार्यालयमा हाजिर भएपछि वन क्षेत्रमा हुने अवैध गतिविधि नियन्त्रणलाई प्राथमिकता दिइएको छ। सोही क्रममा चुरे गाउँपालिका–५ मौरीगाउँबाट वेवारिसे अवस्थामा १४९ दशमलव ९८ क्युफिट चिरान सालका २३० थान काठ बरामद गरिएको थियो।

यसैगरी, पुस १२ गते गौरीगङ्गा नगरपालिका–६ बाट २५ दशमलव २८ क्युफिट सिसौ काठ, एक थान हाते आरा, एक थान किप्याड मोबाइल बरामद गर्दै गोदावरी नगरपालिका–७ का श्यामबहादुर चौधरी र प्रेम चौधरीलाई नियन्त्रणमा लिइएको वन कार्यालयले जनाएको छ।

पुस १९ गते चुरे गाउँपालिका–२ का विभिन्न तीन स्थानबाट पनि सालको काठ बरामद गरिएको छ। एक सामुदायिक वन क्षेत्रबाट ५९ दशमलव १९ क्युफिटका ६८ थान चिरान काठ फेला परेको छ भने सोही दिन फरक–फरक दुई स्थानबाट क्रमशः ३६ दशमलव ८९ र ५१ दशमलव ५१ क्युफिट काठ वेवारिसे अवस्थामा भेटिएको कार्यालयले जनाएको छ।

त्यस्तै, पुस २० गते चुरे गाउँपालिका–२ बाट २७७ थान चिरान सालको काठ बरामद गरिएको थियो, जसको परिमाण १३९ दशमलव ९७ क्युफिट रहेको वरिष्ठ डिभिजनल वन अधिकृत ठाकुरले बताए।

वन कर्मचारीको सक्रियताका कारण वन क्षेत्रबाट अवैध रूपमा कटान गरी विभिन्न स्थानमा लुकाएर राखिएको काठ बरामद गर्न सफल भएको ठाकुरको भनाइ छ। यद्यपि, बरामद काठ कुन–कुन सामुदायिक वन क्षेत्रबाट कटान गरिएको हो भन्ने यकिन तथ्य भने खुल्न नसकेको उनले स्वीकार गरे।

चुरे क्षेत्रमा काठ तस्करीमा केही सामुदायिक वनकै पदाधिकारीसमेत संलग्न रहेको आशंका गर्दै ठाकुरले काठ बरामद भएपछि तस्करहरू भागाभाग गरेको दाबी गरे। उनले आफू कार्यालयमा हाजिर भएयता चोरी निकासी, वन्यजन्तु सिकार र अतिक्रमण नियन्त्रणका लागि कर्मचारीसहित स्वयं संवेदनशील क्षेत्रमा खटिँदै आएको बताए।