धनगढी, २४ चैत/नेपाली काँग्रेसका युवा नेता तथा सुदूरपश्चिमका निवर्तमान भौतिक पूर्वाधार विकास मन्त्री प्रकाश देउवाले युवालाई योग अभ्यासमा जेड्न सके स्वस्थ समाज निर्माण गर्न सकिने बताएका छन् ।
नेता देउवाले आईतबार धनगढी ४ उत्तरबेहेडीमा रहेका पतन्जली योग तथा वेलनेस बहुउदेश्यीय केशर सरिता भवन उद्घाटन गर्दै सो कुरा बताएका हुन् । ‘धनगढीमा युवाहरू कुलतमा फस्ने, डिप्रेशनमा जाने र बेरोजगारीले ग्रसित हुने समस्याले गम्भीर समस्याका रुप लिएको छ’ उनले भने –‘युवाहरूलाई योगसँग जोड्न आवश्यक देखिएको छ ।’ पूर्वमन्त्री देउवाले कुलतबाट युवालाई जोगाउन योगलाई माध्यम बनाउनु पर्नेमा जोड दिँदै भने, ‘समाज निर्माण र देशको विकासका लागि युवाहरूलाई स्वस्थ राख्न जरुरी छ। त्यसका लागि योग नै सबैभन्दा उत्तम उपाय हो ।’
उनका अनुसार लागू औषध दुर्वेशनीले ग्रसित युवा समाजका लागि घातक बन्दै गएका छन् । ‘धनगढीमा कुलतको भयावह अवस्था देखिन्छ। यस्तो अवस्थामा योगमार्फत युवालाई सुधार गरेर सभ्य समाज निर्माण गर्न सकिन्छ’ उनले भने । देउवाले स्थानीय, प्रदेश र संघीय तहका सरकारले योग प्रवद्र्धनमा लगानी गर्नुपर्ने आवश्यकता रहेको बताएका छन्। ‘तीनवटै तहका सरकारले यसतर्फ ध्यान दिनुपर्छ।
सम्बन्धित निकाय र समुदायस्तरमा समेत यसको लागि पहल गर्नुपर्छ ’ देउवाले भने। उनले योगले शारीरिक स्वास्थ्य सुधार गर्छ, बरु मानसिक सन्तुलन कायम गर्न र युवालाई सकारात्मक मार्गमा अघि बढाउन मद्दत पुग्ने धारणा व्यक्त गरे । समाजमा बढ्दो कुलत र बेरोजगारीले सिर्जना गरेको संकटलाई सम्बोधन गर्दै योगमार्फत समाधान खोज्नुपर्नेमा देउवाले जोड दिएका हुन् ।
