धनगढी, ११ साउन/धनगढी उपमहानगरपालिका–५, तारानगरस्थित श्री राष्ट्रिय आधारभूत विद्यालयले पत्रकार भिमबहादुर चौधरीलाई प्रशंसा–पत्रसहित सम्मान गरेको छ।

बाबा टिभीका समाचार प्रमुख रहेका चौधरीलाई विद्यालयले सञ्चालन गर्दै आएको ‘किताब मुक्त शुक्रबार, जीवनोपयोगी शिक्षाको आधार’ अभियान तथा अन्य शैक्षिक गतिविधिहरूलाई समाचारमार्फत व्यापक रूपमा प्रचार–प्रसार गरी विद्यालयको सर्वाङ्गीण विकासमा योगदान पुर्‍याएको भन्दै सम्मान गरिएको विद्यालयले जनाएको छ।

चौधरी यही विद्यालयका पूर्व विद्यार्थी हुन्। उनले यसै विद्यालयबाट कक्षा ५ सम्म अध्ययन गरेका थिए। २०५४ सालमा कक्षामा तृतीय स्थान हासिल गर्दै कक्षा ५ को बोर्ड परीक्षा उत्तीर्ण गरेका उनी वर्षौंपछि आफ्नै विद्यालयबाट सम्मानित भएका हुन्।

सम्मान ग्रहणपछि चौधरीले आफ्नै विद्यालयबाट सम्मानित हुन पाउनु आफ्नो जीवनकै सबैभन्दा गर्विलो र भावुक क्षणमध्ये एक भएको बताए। उनले विद्यालय परिवारप्रति हार्दिक आभार व्यक्त गर्दै आगामी दिनमा पनि शिक्षा, समाज र सकारात्मक अभियानहरूलाई समाचारमार्फत प्राथमिकताका साथ उजागर गर्दै विद्यालयको प्रगतिमा निरन्तर साथ र सहयोग रहने प्रतिबद्धता व्यक्त गरे।

उक्त प्रशंसा–पत्र विद्यालय व्यवस्थापन समितिका पूर्वअध्यक्ष सुरेशराज जोशी र प्रधानाध्यापक मानबहादुर साउँदले संयुक्त रूपमा हस्तान्तरण गरेका थिए।धनगढी उपमहानगरपालिका–५ का वडाध्यक्ष तथा विद्यालय व्यवस्थापन समितिका अध्यक्ष गजेन्द्र शाहीको अध्यक्षतामा सम्पन्न कार्यक्रममा एक्सपर्ट एजुकेसन एण्ड भिसा सर्भिस, धनगढीका शाखा प्रबन्धक नीलम चौधरी प्रमुख अतिथिका रूपमा सहभागी थिए ।