धनगढी, २ साउन/कैलाली जिल्ला अदालतले एक वर्षमा तीन हजार १०५ (६६.९३ प्रतिशत) वटा मुद्दा फर्छयौट गरेको छ । अदालतले सार्वजनिक गरेको वार्षिक विवरणअनुसार आर्थिक वर्षको सुरुवातमा १ हजार २०५ मुद्दा जिम्मेवारी सरेर आएका थिए भने वर्षभरमा ३ हजार ३३४ नयाँ मुद्दा दर्ता भएका छन् ।
यससँगै कुल ४ हजार ५३९ मुद्दा विचाराधीन रहेकामा ३ हजार ५ मुद्दा फछ्र्योट गरिएको छ । आर्थिक वर्षको अन्त्यसम्म १ हजार ५३४ मुद्दा बाँकी रहेको अदालतका श्रेस्तेदार चेतराज पन्तले जानकारी दिएका हुन् । अदालतका अनुसार चालु आर्थिक वर्षका लागि वार्षिक फछ्र्योट लक्ष्य ३ हजार १५२ मुद्दा रहेको थियो ।
न्यायाधीशगत फछ्र्योट विवरणअनुसार माननीय भुवन सिंह थापाले ६९०, दिवेन्द्रनाथ योगीले ५६६, ठाकुरप्रसाद पौडेलले ७१३, गोकुलबहादुर निरौलाले ७४२ र तीर्थराज भट्टाईले २६८ मुद्दा फछ्र्योट गरेका छन् । यसै आर्थिक वर्षमा सरुवा भएका न्यायाधीशमध्ये डम्बरपाणि लामिछानेले ३३, प्रदीपकुमार उपाध्यायले ७० र हरिसिंह धामीले ४४३ मुद्दा फछ्र्योट गरेका थिए ।
अदालतका अनुसार दुई वर्ष नाघेका २२ वटा पुराना मुद्दा अझै विचाराधीन छन् । लक्ष्यअनुसारको फछ्र्योट प्रतिशत ९७.५८ प्रतिशत रहेको विवरणमा उल्लेख छ । यस आर्थिक वर्षमा दर्ता भएका मुद्दामध्ये सबैभन्दा धेरै लागुऔषध सम्बन्धी ४४१, सम्बन्ध विच्छेदका ३७४, बैंकिङ कसुरका २३८, करणी सम्बन्धी १२२ तथा अंश सम्बन्धी ५१६ मुद्दा रहेका अदालतका सूचना अधिकारी पंकज उपाध्यायले जानकारी दिएका छन् ।
