धनगढी, १८ असार  /  गोरखापत्र संस्थानको महाप्रबन्धकमा कैलालीका हिक्मतबहादुर रावललाई नियुक्त भएका छन्। बिहीबार बसेको मन्त्रिपरिषद्ले बैठकले रावललाई नियुक्त गरेको हो ।

यसअघि सूचना तथा सञ्चार मन्त्रालयले महाप्रबन्धकमा आवेदन दिएकामध्येबाट १० जनाको सूची प्रकाशित गरेको थियो । महाप्रबन्धकमा नियुक्त रावलले लामो समय एभिन्युज टेलिभिजनको सुदूरपश्चिम ब्युरो प्रमुखका रूपमा काम गरे ।

त्यसपछि न्युज २४ टेलिभिजनमा सुदूरपश्चिम ब्युरो प्रमुखका रूपमा कार्यरत थिए । त्यसपछि उनी केही समय ग्यालेक्सी टेलिभिजनमा काम गरे । पछिल्लो समय उनी बीबीसी नेपालीसमेत आबद्ध थिए ।

सूचना तथा सञ्चार मन्त्रालयले १० जनाको अल्पसूचीमा रावलसँगै नारायणप्रसाद सापकोटा, भेषराज पाण्डे, राजन नेपाल, रामचन्द्र अर्याल, रुद्रबहादुर खड्का, लक्ष्मण कार्की, विश्वराज खनाल, शान्तराम विडारी र शिवकुमार भट्टराईको नाम समावेश थियो ।